Pajisja e cila është pjesë e stërvitjes “Dragoon Guardian 17” u promovua para shkupjanëve

Pajisja ushtarake e skuadriljes së forcave tokësore të Armatës së SHBA-së për Evropë dhe të batalionit inxhinierik nga Brigada e parë mekanizuese këmbësorike e ARM-së dje u prezantua para qytetarëve të Shkupit.
Nga Minsitria e Mbrojtjes kumtuan se pajisja e cila përbëhet nga automjete ushtarake të terrenit, armatim personal, pajisje mjekësore, mbrojtëse, pajisje për detektim të mjeteve shpërthyese, pjesëtarët e të dy armatave do ta përdorin në stërvitjen e përbashkët “Dragoon Guardian 17”.
Sipas zëvendësministrit të Mbrojtjes, Bekim Maksuti, i cili së bashku me ambasadorin e SHBA-së në Republikën e Maqedonisë, Xhes Bejli morën pjesë në prezantim, kjo stërvitje është kurorë e bashkëpunimit ndërmjet dy armatave.
“Bashkëpunimi bilateral mes Maqedonisë dhe SHBA-së është i shkëlqyeshëm dhe kjo stërvitje ecila është pjesë e bashkëpunimit në mbrojtje tregon se mbështetëse më e madhe e Republikës së Maqedonisë për anëtarësim në NATO është mu SHBA-ja. Republika e Maqedonisë de fakto është e gatshme që sot të bëhet pjesë e Aleancës, por shpresojmë se edhe pengesat e tjera të cilat janë mirë të njohura për opinionin, ngadalë, me një klimë pozitive dhe me një qasje të mirë, do të arrijmë t’i tejkalojmë dhe sa më shpejtë të jemi pjesë e NATO-s”, theksoi Maksuti.
Bashkëpunimi civil ushtarak me komunat vazhdon edhe ditëve në vijim. Sot një lloj të tillë të prezantimit do të kenë mundësi të shohin banorët e Shtipit dhe të Velesit.