Lidhja Demokratike e Kosovës (LDK) ka reaguar ashpër ndaj veprimeve të ministrit në detyrë Xhelal Sveçla, pas një incidenti të ndodhur në Prishtinë, ku ai fotografon një aktivist të LDK-së pa pëlqimin e tij.
Ky incident ka ngjallur reagime të shumta, duke e cilësuar veprimin e Sveçlës si një shkelje të të drejtave themelore të qytetarëve.
LDK shpreh shqetësimin e saj për mënyrën se si një përfaqësues i institucioneve publike mund të sillet në një mënyrë kaq arrogante dhe kërcënuese ndaj qytetarëve.
“Lidhja Demokratike e Kosovës dënon ashpër sjelljen e papranueshme të deputetit Xhelal Sveçla. Aktivisti ynë po qëndronte qetësisht në trotuar, dhe veprimi i tij për ta ndaluar dhe fotografuar është i papranueshëm,” tha një zëdhënës i LDK-së.
LDK e sheh këtë veprim si një shenjë të panikut dhe humbjes së kontrollit politik nga ana e atyre që për vite kanë keqpërdorur institucionet e shtetit.
Kjo sjellje tregon një mungesë të theksuar të respektit për qytetarët dhe për simbolet e vendit.
“Një reagim i tillë, i shoqëruar me tone agresive, është një tregues i qartë se ata ndihen të zhveshur nga mbështetja qytetare. Z. Sveçla ka zgjedhur arrogancën në vend të maturisë, duke kërcënuar qytetarët në vend të promovimit të kulturës demokratike,” theksoi LDK.
LDK gjithashtu thekson se aktivistët dhe çdo qytetar i Kosovës kanë të drejtë të jetojnë dhe shprehen të lirë, pa frikë apo intimidim.
Kjo sjellje përbën një cenim të drejtpërdrejtë të standardeve demokratike dhe është e papranueshme nga kushdo që mban funksione publike.
LDK bën thirrje për një mjedis të qetë dhe dinjitoz për të gjithë qytetarët gjatë procesit zgjedhor. Kjo është një periudhë e rëndësishme për demokracinë në Kosovë, dhe çdo veprim që cënon këtë proces duhet të dënohet ashpër.
LDK mbetet e përkushtuar ndaj respektit dhe kulturës demokratike, duke u angazhuar për standarde të larta që e kanë ndërtuar këtë vend.
Ajo fton të gjitha institucionet përkatëse që të veprojnë për të siguruar një ambient të sigurt dhe të qetë për të gjithë qytetarët.
