Siria ka hequr kërkesën që shtetasit amerikanë dhe britanikë të marrin miratim paraprak përpara hyrjes në vend, pas polemikave të shkaktuara nga videot e amerikanëve që pretendonin se u ishte refuzuar hyrja, transmeton Anadolu.
“Procedurat e hyrjes për shtetasit amerikanë dhe britanikë janë rikthyer në rregullimin e mëparshëm, pas heqjes së kërkesës për miratim paraprak”, tha zv/ministri i Jashtëm për Çështjet Konsullore, Mohammad Yaqoub al-Omar.
Sipas Agjencisë Arabe Siriane të Lajmeve (SANA) al-Omar tha se kjo kërkesë ishte vendosur si masë e përkohshme, por nuk shpjegoi arsyet e vendosjes apo të tërheqjes së saj. Ai shtoi se procedurat e hyrjes për shtetasit e vendeve të tjera mbeten të pandryshuara.
Njoftimi erdhi një ditë pasi në rrjetet sociale qarkulluan video ku shtetas amerikanë pretendonin se u ishte refuzuar hyrja në vend, duke ngritur pikëpyetje lidhur me kufizimet e reja për vizitorët e huaj.
Dje, drejtor i Marrëdhënieve Ndërkombëtare dhe Bashkëpunimit në Autoritetin e Përgjithshëm Sirian për Portet dhe Doganat, Mazen Alloush, konfirmoi se shtetasit amerikanë ishin shtuar së fundmi në listën e kombësive që kërkojnë miratim paraprak nga Ministria e Punëve të Brendshme.
Ai tha se vizat lëshoheshin në pikat kufitare, por se disa kombësi kërkonin miratim paraprak nga autoritetet përkatëse.
Alloush theksoi se autoriteti zbaton udhëzimet e Ministrisë së Punëve të Brendshme dhe nuk vendos se cilat kombësi i nënshtrohen kësaj kërkese.
Autoritetet siriane nuk specifikuan se për sa kohë kishte qenë në fuqi kufizimi për shtetasit amerikanë dhe britanikë.
Më 29 prill, Ministria e Punëve të Jashtme mohoi raportimet për ndryshime në procedurat e hyrjes për shtetasit e huaj, duke deklaruar se rregulloret sipas Vendimit nr. 128, të nxjerrë në korrik të vitit 2025, mbeteshin në fuqi.
MARKETING
<!–
