Të paktën dy persona u vranë dhe 15 të tjerë u plagosën nga të shtënat në një shkollë në Tajlandë, njoftuan mediat lokale, transmeton Anadolu.
Incidenti ndodhi sot në shkollën “Debsirin Nonthaburi” në distriktin Bang Kruai në provincën Nonthaburi në periferi në veriperëndim të Bangkokut, ku ekipet e reagimit të urgjencës konfirmuan se numri i viktimave është rritur nga raportimet e mëparshme, raportoi “Thai Enquirer”.
Fondacioni “Poh Teck Tung”, një organizatë e shpëtimit me bazë në Bangkok, tha se ambulancat po transportonin nxënësit e plagosur në spitalet aty pranë për trajtim. Fondacioni u kërkoi shoferëve në zonë që të pastrojnë rrugët dhe të lejojnë automjetet e urgjencës qasje të papenguar në dhe nga shkolla.
Policia e identifikoi të armatosurin e dyshuar si një nxënës në shkollë, sipas “Thai Enquirer”. Autoritetet vazhduan të sigurojnë ambientet ndërkohë që po zhvillohej një hetim për rrethanat dhe motivin e të shtënave. Mësuesit evakuuan nxënësit nga shkolla gjatë të shtënave, duke i ndihmuar ata të largoheshin nga zona e prekur.
Detaje të mëtejshme në lidhje me identitetin e të vrarëve dhe të plagosurve nuk janë dhënë menjëherë. Provinca Nonthaburi shtrihet menjëherë në veriperëndim të kryeqytetit tajlandez Bangkok dhe është pjesë e rajonit më të gjerë metropolitan të Bangkokut.
Autoritetet nuk kanë dhënë ende informacione të mëtejshme për të dyshuarin ose çfarë mund të ketë çuar në të shtënat.
