Një i ri shqiptar, i identifikuar si Artjol Ramaj, dyshohet se u vra brutalisht nga burri me të cilin jetonte në Spanjë, pas një konflikti për vetëm 5 euro. Trupi i tij u copëtua dhe u shpërnda në një zonë të pyllëzuar pranë banesës, ndërsa eshtrat u zbuluan rreth një muaj e gjysmë më vonë nga një person që po shëtiste qenin. Pas disa vitesh hetime, çështja pritet të kalojë për gjykim me juri në Spanjë.
Ngjarja daton në natën e 2 marsit 2023, kur i riu shqiptar u zhduk pa lënë gjurmë. Prej fundit të vitit 2022, ai jetonte në një shtëpi në zonën e Riudarenes, në Girona, së bashku me një 52-vjeçar të njohur me nofkën “El Seco” (I Thati). Të dy kujdeseshin dhe ruanin një plantacion kanabisi që ndodhej në pronë.
Disa ditë pas zhdukjes, një i njohur i të riut iu drejtua policisë katalanase, Mossos d’Esquadra, pasi nuk kishte marrë asnjë informacion për të. Ai u tregoi efektivëve se marrëdhënia mes shqiptarit dhe 52-vjeçarit ishte përkeqësuar dhe se ata kishin pasur disa konflikte.
Kur mbërritën në banesë, policia arrestoi 52-vjeçarin, pronarin e pronës, për një vepër penale që lidhej me kultivimin e kanabisit. Operacioni i drogës u çmontua, por për shqiptarin nuk u gjet asnjë gjurmë.
Pas hetimeve disavjeçare, gjykata në Santa Coloma de Farners ka vendosur mbylljen e fazës paraprake dhe kalimin e çështjes në gjykim me juri. Prokuroria kërkon për të akuzuarin 22 vjet e 5 muaj burg, ndërsa dy paditë private kërkojnë dënime edhe më të larta.
Sipas dyshimeve të gjykatësit hetues, “El Seco” e ka sulmuar të riun ndërsa ai ndodhej i shtrirë në shtrat dhe nuk dyshonte për asgjë. Shkak për konfliktin e fundit dyshohet të jetë bërë një shumë prej 5 eurosh, të cilat 52-vjeçari pretendonte se shqiptari ia kishte marrë.
Prokuroria pretendon se sulmi ishte tepër brutal dhe se një dëmtim traumatik në tru ishte ndër plagët që i shkaktuan vdekjen të riut.
Më 17 prill 2023, rreth një muaj e gjysmë pas zhdukjes, një person që po shëtiste qenin zbuloi mbetje kockore në një zonë të pyllëzuar pranë kompleksit rezidencial Can Fornaca, jo shumë larg banesës ku jetonin dy personat.
Trupi nuk u gjet i plotë. Sipas hetuesve, mbetjet ishin shpërndarë dhe dëmtuar nga kafshët e egra, përfshirë derrat e egër dhe qentë që frekuentonin zonën. Gjendja e eshtrave nuk lejoi përcaktimin e të gjitha dëmtimeve që mund të kishte pësuar viktima. Pranë tyre u gjet edhe një thikë.
Hetuesit zbuluan disa prova që, sipas prokurorisë, e lidhin 52-vjeçarin me krimin e dyshuar.
Në të njëjtën zonë ku u gjetën eshtrat e shqiptarit u zbuluan edhe një peshqir, një mbulesë jorgani, një jastëk dhe një qilim, të gjitha me njolla gjaku. Gjurmë gjaku u gjetën edhe në dhomën e gjumit të viktimës, ku i akuzuari dyshohet se ishte përpjekur të pastronte provat.
Gjithashtu, policia zbuloi gjurmë gjaku në furgonin që dyshohet se është përdorur për transportimin e trupit drejt zonës së pyllëzuar. Brenda lavatriçes së banesës u gjetën edhe pantallona me njolla gjaku, të cilat, sipas hetuesve, i përkisnin të akuzuarit.
Prokuroria dyshon se trupi u la në atë zonë me qëllim që kafshët e egra ta copëtonin dhe ta bënin më të vështirë identifikimin e tij, si dhe zbulimin e provave.
Pavarësisht provave të mbledhura, “El Seco” mohon të ketë kryer vrasjen. Avokatja e tij pretendon se akuza mbështetet kryesisht në prova rrethanore dhe në një zinxhir dyshimesh, pa prova të drejtpërdrejta që vërtetojnë autorësinë.
Sipas mbrojtjes, fakti që në dhomë kishte gjak nuk provon se vdekja ndodhi aty, ashtu siç bashkëjetesa me viktimën nuk mjafton për t’i atribuar të akuzuarit vrasjen. Ajo kundërshton gjithashtu interpretimin e njollave të gjakut në pantallona dhe në furgon si prova të drejtpërdrejta të sulmit dhe transportimit të trupit.
Avokatja ka kërkuar pushimin e çështjes, duke argumentuar se përfundimet e hetimit janë ndërtuar mbi supozime që mbështesin njëra-tjetrën, por që, sipas saj, nuk provojnë përtej dyshimit përfshirjen e klientit të saj.
Një tjetër element i çështjes lidhet me pamjet filmike të kamerave të sigurisë në kompleksin rezidencial. Gjykatësi i ka kërkuar Bashkisë së Riudarenes të vërë në dispozicion regjistrimet për të identifikuar lëvizjet e mundshme të të akuzuarit në orët pas krimit.
Megjithatë, përgjigjja fillestare e bashkisë ishte se regjistrimet fshiheshin automatikisht gjashtë muaj pas realizimit të tyre, çka e vështirëson sigurimin e këtij materiali për hetimin.
Çështja ka edhe një veçanti procedurale: avokati që përfaqëson babanë e viktimës, Jonathan Juiz, është përfshirë në listën e dëshmitarëve, pasi ishte ndër personat e parë që komunikuan me të akuzuarin për të kërkuar shpjegime mbi zhdukjen e shqiptarit. Megjithatë, ai nuk pritet të dëshmojë në gjyq, ndërsa dy raporte ekspertize ku ka kontribuar gjatë hetimit janë përfshirë në dosjen gjyqësore.
Përveç akuzës për vrasje, ndaj 52-vjeçarit rëndon edhe akuza për përdhosje të kufomës, për të cilën prokuroria kërkon pesë muaj burg.
Sa i përket dëmshpërblimit, prokuroria kërkon 140 mijë euro për prindërit e viktimës dhe 35 mijë euro për motrën. Në një nga argumentet e saj, ajo thekson se familjarët mundën të varrosnin vetëm pjesën e mbetjeve skeletore të djalit të tyre që u gjet në zonë, duke e bërë edhe më të rëndë dhimbjen e humbjes.
<!– Panorama TV desktop
fund Panorama TV–>
<!– Panorama TV mobile
fund Panorama TV–>
