Ministri i Shëndetësisë Bekim Sali sot mori pjesë në ceremoninë e diplomimit të studentëve të Universitetit Shtetëror të Tetovës, nga të cilët numri më i madh janë të Fakultetit të Mjekësisë.
Duke i uruar për suksesin, ministri Sali theksoi se pas shumë viteve diskriminim ndaj të diplomuarve të mjekësisë në Universitetin e Tetovës, tashmë diploma e mjekut të USHT-së do të vlejë njësoj në llogaritjen e pikëve në konkurset për specializime.
“Po ashtu e theksova edhe hapjen e programit të ri të specializimit për mjekësi familjare, mundësinë që 50 të diplomuarit më të suksesshëm ta kenë vendin e punës të garantuar, si edhe bursat për specializimet e gjinekologjisë dhe pediatrisë.
Duke i përmbushur këto mundësi, mendoj se pak a shumë e kemi arsyetuar dhe përmbushur edhe detyrën tonë pse jemi në krye të Ministrisë së Shëndetësisë”, tha Sali.
Ai uroi që këso mundësi të kenë edhe studentët dhe të diplomuarit e tjerë, “sepse fundja suksesi ynë në qeveri nuk do të matet me dekadat e kaluara në pushtet, por me detyrat e realizuara gjatë atij pushteti”.
