Një peticion me mbi 110 mijë nënshkrime, i dorëzuar të hënën në Kancelarinë Federale të Zvicrës, kërkon zgjatjen e pushimit të lehonisë nga 14 javë sa është aktualisht, në gjashtë muaj.
Nismëtarët e peticionit argumentojnë se një zgjatje e tillë është e nevojshme për të forcuar lidhjen emocionale në fazat e para të jetës së fëmijës.
“Katërmbëdhjetë javë pushim lehonie përbëjnë vetëm 98 ditë, një periudhë shumë të shkurtër në një nga fazat më të rëndësishme të jetës së një fëmije”, thuhet në faqen zyrtare të peticionit.
Sipas organizatorëve, në moshën tre muajshe foshnja është ende plotësisht e varur nga nëna. Ata theksojnë se afërsia, ushqyerja me gji, krijimi i lidhjes emocionale dhe ndjenja e sigurisë janë elemente thelbësore për zhvillimin e shëndetshëm të fëmijës.
Përveç nevojave të foshnjës, peticioni vë në dukje edhe rëndësinë e kohës së mjaftueshme për nënën që të rikuperohet fizikisht dhe psikologjikisht pas lindjes. Nismëtarët kërkojnë gjithashtu përmirësimin e ekuilibrit mes jetës familjare dhe asaj profesionale.
Në Zvicër, debati për zgjatjen e pushimit prindëror ka qenë i pranishëm prej kohësh, me disa iniciativa që synojnë modele të reja të lejes për të dy prindërit.
