“Monstra”, partitë shqiptare mirëpresin lirimin e të dënuarve

Partitë shqiptare kanë qenë unike në reagimin e tyre pas vendimit për lirimin e 4 të dënuarve për rastin Monstra. Nga Bashkimi Demokratik për Integrim thonë se kërkesa e prokurorisë si dhe vendimi i gjykatësve janë të drejta dhe në përputhje me pritshmëritë. Aleanca për Shqiptarët inkurajoi organet e drejtësisë që të punojnë për zbardhjen e të gjitha rasteve të montuara me qëllim që fajtorët e vërtetë të dalin para drejtësisë. Lëvizja Besa ka theksuar se lirimi me kusht i të burgosurve të rastit Monstra është tregues se sa e kushtëzuar është liria e shqiptarëve të Maqedonisë, madje edhe në raste kur ekzistojnë prova që flasin për pafajësinë e tyre. VMRO DPMNE-ja nga ana tjetër vlerëson se lirimi i të akuzuarve për terrorizëm nga njëra anë dhe nga ana tjetër paraburgosja e njerëzve që sipas tyre e duan vendin, paraqet imazh të turpshëm për drejtësinë në Maqedoni.