Kryeministri Albin Kurti ka deklaruar se qytetarët serbë të Kosovës kanë reaguar në masë të madhe ndaj thirrjes për konvertimin e targave ilegale, duke e cilësuar këtë si një hap të rëndësishëm drejt integrimit të tyre në institucionet e Kosovës.
Ai njoftoi në Facebook se janë bërë gjithsej 6509 aplikime për konvertimin e patentë-shoferëve nga ilegale në ato zyrtare të Republikës së Kosovës.
“6509 aplikime për konvertimin e patentë-shoferëve nga ilegale në ato zyrtare të Republikës së Kosovës. Vetëm në katër komunat në veri të shtetit tonë, u konvertuan 5732 patentë-shoferë, prej të cilave 2018 në Leposaviq, 1576 në Mitrovicën Veriore, 1177 në Zveçan dhe 961 në Zubin Potok”, ka shkruar Kurti.
Afati për regjistrim, i cili filloi më 9 maj dhe ishte i paraparë të përfundonte më 9 gusht, u shty për dy javë të tjera deri më 23 gusht, “për shkak të kërkesave të shumta dhe interesimit të lartë për konvertimin e patentë-shoferëve”, sipas Kurtit.
Ai vuri në dukje se kjo periudhë tre mujore kaloi pa asnjë incident apo ankesë.
Kryeministri shprehu mirënjohje ndaj qytetarëve të komunitetit serb që e shfrytëzuan këtë mundësi për të bërë një hap drejt integrimit dhe gjithashtu falënderoi zyrtarët e institucioneve për punën dhe asistencën e ofruar gjatë procesit të aplikimit.
“Ky është një hap i rëndësishëm drejt integrimit të plotë të të gjithë qytetarëve tanë në Republikën e Kosovës” ka shkruar tutje Kurti në Facebook./Telegrafi/
