I vihet flaka deponisë ilegale në Haraçinë

Persona të panjohur u kanë vënë zjarrin mbrëmë mbeturinave në deponinë ilegale në afërsi të fshatit Haraçinë. Tymi dhe kundërmimi ka ngulfatur banorët mbrëmë dhe mëngjesin e sotëm.
“Meqë është bërë grumbullimi i mjaftueshëm i mbeturinave është marë iniciativë për tua vënë zjarrin mbeturinave nga ku shihen pamjet se vërtetë një gjendje e keqe ka shkaktuar traumë te qytetarët e që atyre nuk u lejohet te marrin frymë lirshëm”.
Zjarri që ka kapluar këtë vend nga dita e djeshme ka sjellur edhe pasojat ku rreth hapësirës ka shkrumbuar gjelbërimin. Banorët e ndjejnë rrezikun që u kanoset nga mospërgjegjësia e komunës, dhe thonë se po mbyten nga ajri i ndotur dhe papastërtia që po i rrethon.
“Mbeturinat na mbytën krejt, prej qenve sun kalojmë rrugës, komuna nuk merr masa për mbeturinat . Mbeturinat të gjitha të këqijat po na i sjellin me sëmundje dhe gjitha të këqijat i kemi”, ka deklaruar njw banor.
Ekipi i Televizionit Shenja kërkoi prononcim nga Kryetari i Komunës së Haraçinës Brahim Ajvazi, por ai ishte i paaritshëm. Nuk përgjigjej as në telefonatat e ekipit tone, ndërsa edhe pse e kërkuam në godinën e Komunës, nuk arritëm të marrim deklaratë prej tij.
Hava Tahiri