Të premten është mbajtur ceremonia e pranim-dorëzimit të autoblindave të reja të prokuruara nga Shtetet e Bashkuara të Amerikës për Forcën e Sigurisë së Kosovës (FSK).
E lidhur me këtë, Ambasada e Shteteve të Bashkuara të Amerikës ka bërë të ditur se bëhet fjalë për 50 automjete të blinduara, të cilat do të kontribuojnë në forcimin e kapaciteteve mbrojtëse të FSK-së.
“Shtetet e Bashkuara kanë kënaqësinë t’i transferojnë 50 Automjete të Blinduara Sigurie (ASV) Qeverisë së Kosovës. Kosova, duke përdorur burimet e saj mbrojtëse, do t’i sjellë këto automjete në kapacitet të plotë operacional,” theksohet në postimin e ambasadës.
Ky transferim i automjeteve të blinduara përfaqëson një hap të rëndësishëm në angazhimin e përbashkët për forcimin e kapacitetit mbrojtës të FSK-së dhe sigurisë së dy kombeve, duke theksuar rëndësinë e partneritetit strategjik me SHBA-në.
Ministri në detyrë i Mbrojtjes, Ejup Maqedonci, shprehu gëzim për avancimin dinamik të Forcës së Sigurisë së Kosovës, e cila vazhdon të fuqizohet me teknologji dhe mjete të avancuara për të garantuar realizimin e misionit të saj kushtetues.
“Ky angazhim për transformimin në një Forcë të fuqishme dhe profesionale nuk do të ishte i mundur pa mbështetje nga një partner strategjik dhe i pazëvendësueshëm — Shtetet e Bashkuara të Amerikës, miku ynë i përjetshëm,” ka shkruar Maqedonci.
Forca e Sigurisë së Kosovës po kalon një periudhë të rëndësishme zhvillimi, duke u pajisur me mjete të reja dhe teknologji që do të rrisin efikasitetin e saj në mbrojtjen e vendit. Kjo është një shenjë e qartë e angazhimit të Kosovës për të forcuar kapacitetet e saj mbrojtëse.
Me këtë hap, FSK-ja jo vetëm që rrit aftësitë e saj operacionale, por gjithashtu forcon marrëdhëniet me aleatët ndërkombëtarë, duke e pozicionuar Kosovën si një aktor të rëndësishëm në stabilitetin e rajonit.
