Në Qeveri po zhvillohet takimi i kryeministrit dhe liderit të VMRO-DPMNE-së, Hristijan Mickoski dhe kryetarit të LSDM-së, Venko Filipçe.
Filipçe para takimit me kryeministrin deklaroi se pret një bisedë konstruktive dhe se është optimist i matur.
“Sinqerisht pres një bisedë konstruktive. Më vjen shumë mirë që kryeministri e pranoi takimin menjëherë”, deklaroi Venko Filipçe dhe shtoi se gjatë takimit do të përpiqet t’i sqarojë kryeministrit më në detaje temat që ka ngritur në konferencën e djeshme për media. Në të njëjtën kohë, ai tha se i vjen keq që dje parti të caktuara politike u përpoqën të futin një lloj dimensioni etnik dhe se ai absolutisht e mohon një gjë të tillë.
“Thirrja për një takim ndërpartiak ishte dhe është ende për të gjitha palët, duke qenë se kryeministri ishte i pari dhe e pranoi menjëherë. Këtu do të diskutojmë tema që besoj se duhet të menaxhohen së bashku, të cilat nuk janë menaxhuar kurrë më parë kështu. Temat i ngrita dje, sot do të përpiqem t’i shpjegoj më në detaje, si dhe disa mënyra të sugjeruara, siç mendoj aktualisht, pa pretenduar se kjo është mënyra e duhur. Sigurisht që jam i hapur për t’i diskutuar të gjitha opsionet. Sa i përket pritjeve, si gjithmonë, dua të them se jam optimist i matur”, tha kryetari i LSDM-së, Venko Filipçe.
Para takimit me Mickoskin, Filipçe ka përsëritur se i mohon pretendimet e BDI-së, duke theksuar se takimi nuk ka dimension etnik.
“Të gjithë janë të ftuar, të gjithë liderët duhet të vazhdojnë të marrin pjesë në takimet e radhës sepse kjo është për të mirën e vendit dhe të gjithë qytetarëve”, tha Filipçe.
Pas takimit pritet një deklaratë nga lideri i LSDM-së opozitare, ndërsa Qeveria ka paralajmëruar komunikatë nga takimi.
