BESA dhe Aleanca miqësore edhe në futboll (VIDEO)

Portier i Aleancës, lojtar të Besës. Portier i Besës, lojtar të Aleancës por edhe tek tuk të Besës. Kjo ishte përbërja e dy ekipeve të koalicionit më të ri të cilët luajtën futboll për të përçuar mesazhin e bashkëpunimit.
Tashmë fotografia që çdo ditë duket në shtabet e partive me larmi posterësh të të dy palëve, reflektohej edhe në terrenin sportiv.
Faruk Avdiu i Aleancës ishte i pari që kishte arritur në terren dhe bashkë me aktivistët e Besës dhe të partisë së tij. Po bënin përgatitjet për lojë dhe prisnin Zeqirija Ibrahimin.
I pyetur nga gazetarët nëse i kanë ftuar aktivistët e BDI-së për të luajtuar, Ibrahimi me buzën në gaz tha se kanë menduar t’i thirrin vetëm si refer, por kanë ndërruar mendje pasi nuk i besojnë gjykimit të drejtë të tyre.
Ibrahimi është i bindur se fryma pozitive mes këtyre dy partive do të korrë sukses në rrethin e dytë, pasi siç tha, ata janë dy subjekte shqiptare të bashkuar për të mirën e popullit të vet, ndërsa kundërshtari i tyre është vetëm një siç e quajti, kukull e pushtetit.
Meqë loja ishte miqësore, golat nuk numëroheshin. Por dy eksponetët partiak thanë se me lojën e sotme duan tua bëjnë me dije të rinjve të Çairit se me të gjitha forcat do të tentojnë të sigurojnë sa më kushte për sport dhe rekreacion.