Ky është momenti tragjik kur dy trenat përplasen kokë më kokë në Larisa të Greqi. Përplasja është kaq e fortë, sa menjëherë shpërthejnë flakët.
Nga ajo që mund të shihet edhe në video trenat udhëtonin në të njëjtën hekurudhë, me shpejtësi prej 166 km/h, duke e bërë të pamundur shmangien e përplasjes.
Të paktën 40 persona humbën jetën nga ky aksident fatal. 85 të tjerë mbetën të plagosur, 6 prej të cilëve në gjendje të rëndë.
66 nga të plagosurit ndodhen të shtruar në spital. Burime për Televizionin Klan konfirmuan se 9 prej tyre janë shqiptarë, ndër të cilët 2 janë në gjendje të rëndë në spitalin e Larisës, njëri 23 dhe tjetri 25 vjeç.
Ngjarja tragjike ndodhi pak pas orës 23:00, me orën lokale. Në aksident u përfshinë një tren udhëtarësh ku ndodheshin rreth 350 persona, me një tren mallrash. Përveç zjarrit, 3 vagonë të trenit të udhëtarëve përfunduan jashtë shinave.
Autoritetet greke vunë në pranga në mesditë përgjegjësin e stacionit hekurudhor në Larisa, teksa hetimet për ngjarjen e rëndë vijojnë./tvklan.al
