Më 24 shkurt të vitit 2018, Lëvizja BESA do të mbajë Kongresin e parë partiak. Kështu është vendosur në mbledhjen e Këshillit Qendror të Lëvizjes BESA të shtunën në Shkup, ku është shqyrtuar rrugëtimi politik i kësaj partie në 3 vite të plota që nga dalja në skenën politike.
Lëvizja BESA
“Duke u bazuar në nenin 38 të Statutit të Lëvizjes BESA, Këshilli Qendror i Lëvizjes BESA diskutoi për zgjedhjet e brendshme në Lëvizje dhe për organizimin e Kongresit të Lëvizjes. Pastaj në mënyrë unanime u vendos që, pas realizmit të zgjedhjeve të brendshme, Kongresi i Parë i Lëvizjes BESA të mbahet më 24 shkurt të vitit 2018”
Përpos datës për mbajtjen e Kongresit, nga Lëvizja BESA informojnë se në takim, ata kanë bërë edhe vlerësimin e punës së deritanishme të tyre, që nga paraqitja si Lëvizje politike. Paraqitja e tyre në skenë, sipas BESËS, ka rimodeluar arenën politike në Maqedoni, në veçanti në kampin politik shqiptar, duke vendosur parime të fuqishme politike dhe moral të ri politik.
Lëvizja BESA
“BESA është partia e parë shqiptare në historinë politike të shqiptarëve të Maqedonisë që, për shkaqe parimore dhe duke u qëndruar besnike premtimeve ndaj elektoratit të saj, vendosi të mos bëhet pjesë e qeverisë, ndonëse ka pasur ofertë të hapur,duke vendosur kështu standarde të reja të politikëbërjes shqiptare në këtë shtet.
Nga Lëvizja BESA thonë se qëndrimi i anëtarëve të Këshillit Qendror ishte se tani Besa ka nevojë për një kongres me qëllim të konsolidimit dhe fuqizimit, por edhe për një shtrirje jo vetëm sasiore, sa cilësore dhe akoma më përfshirëse.
