Policia Kombëtare e Spanjës njoftoi se ka arrestuar 3 persona në provincën e Barcelonës, si autorë të dyshuar të vrasjes së një shtetasi shqiptar verën e vitit të kaluar, trupi i të cilit u gjet tre muaj më pas brenda një thesi në rezervuarin Casasola, në komunën Almogía të Malagas dhe që po dekompozohej.
Të arrestuarit janë dy shqiptarë 36 dhe 45 vjeç dhe një 59-vjeçare spanjolle që i ka ndihmuar autorët për t ëlarë hesapet e tyre të drogës.
Media spanjolle ka zbardhur edhe detajet dhe momentet e operacionit të arrestimit (VIDEO). Trupi u gjet rastësisht nga një banor që drejtonte një karrocë.
Viktima ishte lidhur dhe brenda në thes kishte copa betoni që të fundosej e të mos gjendej. Pamjet filmike dhe analizat e ADN zbardhën krimin.
Autorët sipas dinamikës dhe hetimeve të udhëhequra nga Grupi i Krimit të Organizuar i Marbellës së bashku me Njësinë e Drogave dhe Krimit të Organizuar (UDYCO) të Costa del Sol dhe Grupin 23 të UDET të Barcelonës, ka arritur në përfundimin se vdekja “ishte e motivuar nga një larje hesapesh”, në kuadër të një rasti ndërkombëtar të trafikut të drogës, thanë ata në një deklaratë këtë të martë.
Për ta futur në kurth ata e kanë joshur shqiptarin 31-vjeçar me marrëveshje biznesi për transaksion dhe drogë. Ata e mashtruan dhe pas takimit në Malaga e ekzekutuan dhe hodhën në ujë për të fshehur gjurmët.
Më pas u rikthyen në Barcelonë, ku kryenin veprimtarinë e paligjshme. Emrat e autorëve dhe viktimës nuk janë publikuar ende, por tani janë zbardhur detajet e reja pas arrestimeve në muajin shkurt.
“Me urdhër të autoritetit gjyqësor kompetent, tre personat janë lënë në paraburgim. Bëhet fjalë për dy bashkëkombës të viktimës me lidhje me trafikun e drogës, të cilët policia i konsideron autorë të krimit, dhe një grua spanjolle, bashkëpunëtore, e cila mori me qira një automjet në emrin e saj për t’ia vënë në dispozicion të të parit”, informon media.
Hetimi filloi pas një raporti të paraqitur në maj 2025, në të cilin një grua raportoi zhdukjen e partnerit të saj “nën rrethana të çuditshme”. E njëjta grua bashkëpunoi me Policinë Kombëtare në rindërtimin e orëve të fundit të partnerit të saj.
Herën e fundit që u panë me njëri-tjetrin ishte më 12 maj, kur i ndjeri mori një telefonatë nga miq të supozuar ndërsa po drekonin me partneren e tij në një restorant në Marbella. Ata caktuan një takim me të në lagjen Puerto de la Torre të Malagas. Çifti jetonte në qytetin Benahavís, ku sipas deklaratës së policisë, ata “jetuan një mënyrë jetese luksoze”. Për më tepër, familja është nën presion “me kërcënime” nga rrjeti kriminal gjatë hetimit, me qëllim ndalimin e kërkimit.
Trupi nuk u gjet deri më 14 tetor, pesë muaj pas zhdukjes, kur një udhëtar i një karrocerie gjeti “një thes të dyshimtë “, brenda të cilit agjentët zbuluan trupin e lidhur me lidhëse kabllosh dhe disa blloqe çimentoje me të cilat kishin ndërmend ta zhytnin pakon në fund të rezervuarit.
“Gjithçka sugjeron se rënia e nivelit të rezervuarit pas sezonit të verës e ekspozoi trupin, duke penguar planin e autorëve për ta zhdukur kufomën dhe bashkë me të edhe provat e krimit”, theksojnë hetuesit.
Trupi u gjet në një gjendje dekompozimi saponifikimi, një proces kimik që ndodh në mjedise të ngrohta dhe të lagështa në të cilin dhjami i trupit transformohet në një substancë të dylltë dhe sapunoze, duke vonuar kalbjen, e cila ende lejonte “të shiheshin disa tatuazhe”.
Rezultatet e krahasimit të ADN-së, si dhe veshjet dhe tatuazhet e burrit, lejuan që i ndjeri të identifikohej si i riu shqiptar, zhdukja e të cilit ishte raportuar muaj më parë. Për më tepër, autopsia konfirmoi edhe shkakun e vdekjes së dhunshme .
Sipas hetuesve, makina e përfshirë në krim ishte marrë me qira nga një lokal në Barcelonë nga një grua 58-vjeçare dhe “kishte udhëtuar, në ditët para zhdukjes, nëpër zonën ku viktima ishte parë për herë të fundit”.
Pasi identifikuan këtë grua, agjentët arritën të identifikonin autorët e vrasjes, dy burra shqiptarë të moshës 36 dhe 45 vjeç, të cilët kishin udhëtuar nga Barcelona në Malaga posaçërisht për të kryer vrasjen. Ata u arrestuan në shkurt dhe akuzohen për vrasje dhe pjesëmarrje në një organizatë kriminale.
