Ministri i Brendshëm, Xhelal Sveçla, ka zbuluar se i dyshuari për vrasjen e Arlinda Zekajt kishte një histori të rëndë kriminale në Policinë e Kosovës, e cila ka ngjallur shqetësime të mëdha për sistemin e mbrojtjes së viktimave.
Sveçla theksoi se vendimet e marra në lidhje me ndarjen e Arlindës nga fëmija i saj ishin të papranueshme dhe se ato kishin kontribuar në rrezikimin e jetës së saj. Ai shprehu shqetësim se, në vend që të mbrohej viktima, situata kishte marrë një drejtim të kundërt, duke e lënë atë të pambrojtur.
“Ajo ishte e privuar nga fëmija i saj. Një institucion kishte vendosur që t’i merrte fëmijën dhe t’ia jepte babait, i cili kishte deleguar përgjegjësitë te vëllai i tij, një person me një dosje të rëndë në polici. Ligji thotë se besimi për fëmijën i takon nënës, por vendimet e marra ishin të papërshtatshme,” deklaroi Sveçla gjatë seancës së sotme.
Ministri gjithashtu foli për çështjen e pronës, duke theksuar se Arlinda ishte privuar nga e drejta e saj mbi pronën që i përkiste çiftit. Ai shprehu habi se si dikush kishte marrë një vendim të tillë, duke lënë viktimën pa mbrojtje.
“Ajo është privuar nga prona, e cila sipas informacioneve ka qenë e çiftit. Është e çuditshme se si dikush ka vendosur që ajo të privohet nga prona, ndërsa dhunuesi nuk është arrestuar, duke lënë të kërcënuar Arlindën dhe fëmijën e saj,” tha ai.
Sveçla e përshkroi humbjen e jetës si privimin më të rëndë që mund t’i ndodhë një njeriu dhe theksoi angazhimin e institucioneve për të arrestuar sa më shpejt të dyshuarin. Ai kërkoi që rasti të trajtohej me seriozitet maksimal.
“Privimi më i rëndë është ai nga jeta. Ne jemi angazhuar maksimalisht që krimineli të arrestohet sa më shpejt,” theksoi ai, duke kërkuar që rasti të trajtohet nga Prokuroria Speciale për të siguruar një hetim të plotë dhe të drejtë.
Ministri ka kërkuar që rasti të ngritet në nivelet më të larta të Policisë së Kosovës, duke shpresuar se ky rast do të shërbejë si një mësim për përmirësimin e sistemit të mbrojtjes së viktimave dhe për të parandaluar tragjedi të ngjashme në të ardhmen.
