Pas hartimit të “Strategjisë për reforma në sektorin e jurisprudencës”, një iniciativë e Ministrisë së Drejtësisë me mbështetjen e ekspertëve të fushës së drejtësisë, sot ministri i këtij dikasteri z.Bilen Saliji priti në takim pune z. Tibor Draskovic – ekspert nga Bashkimi Evropian. Ky takim vjen në vazhdën e përpjekjeve për përmirësimin dhe përshtatjen e funksionimit të institucioneve të drejtësisë në Maqedoni me kriteret dhe kërkesat e BE-së. Në këtë takim, z. Saliji, e falënderoi z. Draskovic për mbështetjen e ofruar për vendin tonë dhe gatishmërinë e treguar për këtë bashkëpunim. Ai, vlerësoi se pranimi dhe mbështetja e kësaj strategjie nga ana e ekspertëve të BE-së, do t’i kontribuoi përmbushjes me sukses të kërkesave të Bashkimit Evropian për institucionin tonë. Nga ana e tij, z. Tibor Draskovic, shprehu vlerësim për strategjinë në fjalë duke e cilësuar atë si një strategji ambicioze për të cilën mund të ndiheni krenarë. Ai gjithashtu theksoi se kjo strategji vjen në një moment kyç për vendin, pasi që Maqedonia ndodhet në një moment tejet të rëndësishëm në rrugëtimin e saj për t’u bërë pjesë me të drejta të plota në familjen e madhe evropiane. Të dyja palët, shprehën gatishmërinë e tyre për bashkëpunim sa më të suksesshëm në vazhdim.
