Pas incidentit të ndodhur një ditë më parë pranë Kuvendit gjatë protestës dhe deklaratave të kryeministrit Edi Rama për File Bulkun dhe djalin e saj me spektër autik, Endin, është shtuar vala e solidaritetit në mbështetje të familjes.
Një fushatë në platformën GoFundMe ka arritur të mbledhë deri më tani rreth 150 mijë dollarë.
Ndërkohë, organizata jofitimprurëse “Brandon Forever 22 Legacy” ka nisur një fushatë humanitare për të ndihmuar File Bulkun dhe djalin e saj.
Sipas organizatorëve, familja jeton në kushte të vështira dhe banesa e tyre ka nevojë për rikonstruksion urgjent. Fillimisht fushata synonte të mblidhte 85 mijë dollarë për rehabilitimin e banesës dhe mbulimin e trajtimit e kujdesit për Endin, por kontributet kanë tejkaluar objektivin, duke arritur deri tani në rreth 150 mijë dollarë.
Organizatorët u kanë bërë thirrje qytetarëve të vazhdojnë të kontribuojnë sipas mundësive, duke theksuar se fondet do të përdoren për të përmirësuar kushtet e jetesës së familjes dhe për të garantuar mbështetjen e nevojshme për djalin me spektër autik.
