Edicioni i 140-të i Panairit të Import-Eksportit të Kinës, i njohur ndryshe si Panairi i Kantonit, do të mbahet në tri faza, nga 15 tetori deri më 4 nëntor, në Guangzhou (provinca Guangdong, Kina Jugore). Në të pritet të marrin pjesë më shumë se 32,000 kompani, njoftoi të premten Ministria e Tregtisë, citon “Xinhua”.
Gjatë shtatë dekadave të fundit, Panairi i Kantonit është shndërruar në panairin më të madh dhe më jetëgjatë ndërkombëtar të tregtisë në Kinë, duke ofruar gamën më të gjerë të produkteve, numrin më të madh të blerësve dhe vëllimin më të lartë të transaksioneve, tha Zhang Li, ndihmësministër i Tregtisë, në një konferencë për shtyp.
Tregtia e mallrave në Kinë u rrit me 17.6 për qind në baza vjetore, duke arritur në 34.8 trilionë juanë (rreth 5.15 trilionë dollarë amerikanë) në tetë muajt e parë të vitit 2026; eksportet u rritën me 14.6 për qind, ndërsa importet shënuan një rritje prej 22 për qind.
Zhang theksoi se tregtia e jashtme e Kinës ka shfaqur një vrull më të fortë në inovacion dhe përmirësim të vazhdueshëm strukturor gjatë këtij viti, tendenca që pasqyrohen edhe në Panairin e Kantonit.
Ndër ekspozuesit, më shumë se 11,000 janë ndërmarrje të cilësisë së lartë, përfshirë ato që përdorin teknologji të specializuara dhe të sofistikuara për të prodhuar produkte të reja e unike, si dhe ato që mbajnë pozicione udhëheqëse në segmente specifike të prodhimit, vuri në dukje Zhang.
Rreth 64 për qind e ekspozuesve përdorin teknologji të reja, si interneti industrial dhe inteligjenca artificiale (IA), ndërsa produktet e reja dhe ato “të gjelbra” (miqësore me mjedisin) do të përbëjnë përkatësisht 23.2 për qind dhe 26 për qind të artikujve të ekspozuar, shifra këto që arrijnë nivele rekord.
Panairi i këtij viti do të përmirësojë më tej operacionet e tij digjitale dhe inteligjente përmes integrimit të teknologjive si IA dhe të dhënat e mëdha në të gjithë procesin e ekspozimit, tha Zhang. Aktiviteti do të prezantojë për herë të parë 22 skenarë aplikimesh inteligjente dhe 16 aplikacione të inteligjencës artificiale, si dhe do të jetë i pari në industrinë kineze të panaireve që ofron navigim në të gjithë hapësirën e ekspozitës dhe shfaqje të informacionit mbi stendat përmes realitetit të shtuar.
Kompanitë e tregtisë së jashtme po kalojnë gjithnjë e më shumë nga thjesht sigurimi i porosive dhe shitja e produkteve, drejt ndërtimit të sistemeve të biznesit dhe përmirësimit të shërbimeve. Panairi i këtij viti do të përfshijë për herë të parë 10 kategori të shërbimeve për prodhuesit në seksionin e shërbimeve tregtare, ndërsa 36.5 për qind e ekspozuesve kanë kaluar në një model “produkt plus shërbim”, bëri të ditur Zhang. Deri tani, më shumë se 210,000 blerës të huaj kanë përfunduar regjistrimin paraprak për panairin e këtij viti.
Ky vit shënon 70-vjetorin e Panairit të Kantonit.
