Nga sot deri të shtunën, Ohri do të jetë nikoqir i Takimit të 4-t Vjetor të Forumit Ballkanik të Gjykatave Kushtetuese (BCCF), duke u shndërruar në qendër të dialogut ndërkombëtar për çështjet kushtetuese.
Konferenca organizohet nga Gjykata Kushtetuese e Republikës së Maqedonisë së Veriut, me mbështetjen e Misionit të OSBE-së në Shkup. Në të do të marrin pjesë kryetarë dhe gjykatës të gjykatave kushtetuese, përfaqësues të institucioneve ndërkombëtare dhe ekspertë të njohur të së drejtës.
Pjesëmarrësit do të shkëmbejnë pikëpamje dhe përvoja lidhur me sfidat bashkëkohore me të cilat përballet drejtësia kushtetuese.Forumi Ballkanik i Gjykatave Kushtetuese (BCCF) synon të krijojë një hapësirë bashkëpunimi, ku përvojat e ndryshme kombëtare bashkohen përmes angazhimit të përbashkët për mbrojtjen e kushtetutshmërisë, të drejtave themelore dhe vlerave demokratike.
Në kuadër të takimit, nesër do të mbahet konferenca ndërkombëtare me temë “Sfidat bashkëkohore për sundimin e ligjit: Roli i gjykatave kushtetuese”.
Në konferencë do të trajtohen çështje që lidhen me forcimin e besimit të qytetarëve në gjykatat kushtetuese, sigurimin e mbrojtjes efektive kushtetuese dhe sfidat që sjell epoka digjitale.
Në këtë aktivitet pritet të marrin pjesë dhe të mbajnë fjalime përfaqësues të lartë shtetërorë dhe ndërkombëtarë të kësaj fushe.
