Nga Këshilli Republikan për Siguri në Komunikacion (KRSK) thonë se sipas statistikave, motoçiklistët vazhdojnë të jenë grupi më i rrezikuar në komunikacion.
“Statistika për motoçiklistët që përfshihen në aksidente rrugore është shqetësuese. Sipas të dhënave, vjet kanë humbur jetën 125 persona në aksidente, ndërsa 18 prej tyre janë motoçiklistë”, thonë nga KRSK-ja.
Sipas këtij Këshilli me lëndime të rënda trupore vitin e kaluar kanë përfunduar gjithsej 158 motoçiklistë.
“Gjendja me sigurinë e motoçiklistëve në komunikacion është shqetësuese nëse merret parasysh fakti se në Maqedoni ata përbëjnë rreth 2% të numrit të pjesëmarrësve në komunikacion, ndërsa në vitin 2020, rreth 15 nga numri i përgjithshëm i të vdekurve janë motoçiklistë. Duhet të potencohet se krahas kufizimeve ligjore, për shkak të kushteve të motit, motoçiklistët në komunikacion janë aktiv vetëm gjashtë muaj”, thuhet në njoftimin e KRSK-së.