Dy persona janë lënduar rëndë pasi një veturë e tipit „Mercedes“ ka dalë nga autostrada „Miqësia“ dhe ka përfunduar në oborrin e një shtëpie familjare, në afërsi të fshatit Trubarevë të Shkupit.
Sipas informacioneve nga Ministria e Punëve të Brendshme (MPB), aksidenti është raportuar sot në orën 01:10. Automjeti me targa të Shkupit drejtohej nga një 33-vjeçar nga fshati Batincë, i cili ka humbur kontrollin mbi veturën dhe ka dalë nga rruga.
Nga aksidenti, lëndime të rënda trupore kanë marrë shoferi dhe bashkudhëtari i tij 39-vjeçar nga Shkupi. Lëndimet janë konstatuar në Qendrën Emergjente pranë Kompleksit Klinik „Nëna Terezë“.
Këqyrjen në vendin e ngjarjes e ka kryer një ekip i SPB Shkupit.
