Almakos: Cilat janë ritualet dhe shprehitë tua të mëngjesit?
Vjosa Selimi: Gjëja më e rëndësishme për mua është që të ngrihem herët dhe menjëherë pason bërja e planeve për obligimet e përditshme, por çdoherë duke u mbështetur në të menduarit pozitiv. Besoj që mënyra e të menduarit në minutat e para pas zgjimit e përcakton rrjedhën e tërë ditës.
Përgatitem për në punë gjithnjë e shoqëruar nga muzika. Më tërheq thjeshtësia, andaj i përmbahem në të gjitha fushat e jetës. Përpiqem të bëj gjëra që janë praktike, por që njëkohësisht do të më nxisin dhe do të më japin energji. Sa i përket të ushqyerit e respektoj rregullën që gjithmonë të ushqehemi para se të pijmë kafe.
Mendoj që çdonjëri nga ne duhet ta fillojë ditën së paku 2 orë para takimit të parë ose detyrës së parë në punë.
Almakos: Si rrjedh një ditë pune e ytja?
Vjosa Selimi: Shumë shpesh dita e punës më fillon me telefonata. Gjithashtu shumë shpesh më ndodh që të fillojë edhe para se mbërrij në punë.
Funksionoj në zyrë por edhe jashtë, pa orar pune të caktuar. Shpesh ndodh që të punoj jashtë orarit të punës. Me pak fjalë, çdo ditë është e ndryshme.
Natyra e punës si zëdhënëse ta imponon që të përballesh me shumë sfida dhe punë të paplanifikuara gjatë ditës. Megjithatë me kalimin e kohës kjo shndërrohet në rutinë dhe mësohesh të punosh në këtë dinamikë pune.
Kjo punë kërkon fokus dhe vëmendje, ndërsa sqarimet gjithmonë duhet të jenë të sakta dhe të qarta.
Jam shumë me fat që kam kolegë të mrekullueshëm në Departamentin e Komunikimit ku punoj. Të gjithë jemi shumë kolegjial dhe i ndihmojmë njëri tjetrit. Në departament dominon energjia pozitive dhe kjo më ndihmon dhe më shumë në kryerjen e detyrave të punës.
Almakos: Këshilla më e mirë që e ke marrë në jetë është…
Vjosa Selimi: „Asnjëherë mos harro që ti je personazhi kryesor në historinë tënde të jetës“ janë fjalët e mençura që m’i ka thënë kolegu dhe shoku im më i çmuar Atanas Kovaçevski i сili shumë herët u nda nga ne në vitin e kaluar.
Kjo rregull e artë për të cilën jam emocionalisht e lidhur, do të jetë përgjithmonë pjesë e imja dhe e vendimeve të mia të jetës.
Almakos: Si e plotësoni kohën tuaj të lirë?
Vjosa Selimi: Më bën të lumtur koha e kaluar me më të dashurit dhe miqtë, prandaj edhe pjesën më të madhe të kohës së lirë e kaloj me ata. Më pëlqen leximi dhe të shikoj filma në kinema.
Almakos: Në çka përkushton më shumë vëmendje në lidhje me dukjen tënde?
Vjosa Selimi: Vëmendjen dhe kujdesin më të madh e ndaj për lëkurën, e në vend të dytë vijnë vetullat dhe qerpikët. Sigurisht që kjo nuk është e gjitha por në qoftë se duhet të bëj një renditje, këta do të kishin përparësi. Flokët e gjatë i kam thjeshtë një gjenetikë të mirë të trashëguar.
Më pëlqejnë vetëm ngjyrat e errëta dhe zakonishtkam rroba të tilla. Të mos harroj të përmend që i adhuroj palltot e gjata.
Almakos: Ku e sheh veten për 10 vite?
Vjosa Selimi: Për 10 vite, mbi gjitha e shoh veten me të njejtin shpirt luftarak që e kam patur gjithmonë. E rrethuar me më të dashurit dhe edhe më e realizuar profesionalisht dhe në jetën private.
Almakos: Si ta ndryshoi jetën kovid pandemia?
Vjosa Selimi: Pandemia na detyroi që ta vlerësojmë momentin dhe t’i gëzohemi të tashmes. E kuptuam se sa të rëndësishme janë vendimet tona dhe se një ditë patjetër do të duhet të ballafaqohemi dhe të jetojmë me to. Mësuam se shëndeti është mbi gjitha dhe që duhet t’i mënjanojmë të gjitha gjërat që na ndikojnë negativisht ose që na bëjnë të ngecim në jetë. Më e rëndësishmja është që të rrethohemi me njerëz që na duan dhe respektojnë sepse vetëm në këtë mënyrë mund të jemi të motivuar për përparim.
