Ekspozita e 23-të Kinë-ASEAN, që po zhvillohet aktualisht në Nanning (kryeqendra e Rajonit Autonom Guangxi Zhuang në Kinën Jugore), ka prezantuar një treg të inteligjencës artificiale, i pari i këtij lloji. Kjo nismë synon të nxisë bashkëpunimin në ekonominë digjitale duke lidhur zgjidhjet kineze të AI me nevojat e vendeve të ASEAN-it.
Sipas organizatorëve, ekspozita e këtij viti – e cila mbahet nga 17 deri më 21 shtator – po hap rrugë të reja në sektorin e AI, duke përfshirë një mjedis kryesor dhe një mjedis dytësor, secili me një fokus të veçantë.
Mjedisi kryesor shfaq teknologji të avancuara, si modelet e mëdha gjuhësore dhe çipat e AI, ndërsa mjedisi dytësor paraqet mbi 400 produkte nga 60 kompani, të përshtatura për tregun e ASEAN-it, duke përfshirë syze me AI, robotë inteligjentë dhe pajisje për rehabilitim e kujdes shëndetësor. Vizitorët dhe blerësit mund t’i provojnë këto produkte në vend dhe të bëjnë porosi direkt.
Në mjedisin dytësor, kompani kineze si Huawei, iFlytek dhe Unitree Robotics po shfaqin përparimet më të fundit në inteligjencën e trupëzuar (embodied intelligence), aplikimet e modeleve të mëdha dhe qeverisjen urbane. Në të njëjtën skenë, organizata nga vendet e ASEAN-it, përfshirë Tajlandën dhe Indonezinë, po prezantojnë gjithashtu teknologjitë e tyre vendase të AI.
Mjedisi dytësor i sektorit të AI do të mbetet i hapur gjatë gjithë vitit edhe pas përfundimit të ekspozitës, duke shfaqur produkte kineze të AI për konsumatorët dhe duke ndihmuar që “produktet më të suksesshme të ekspozitës” të shndërrohen në një forcë shtytëse të qëndrueshme për zgjerimin e tyre në tregun global.
“Ne nuk po kërkojmë teknologjinë më të avancuar apo gamën më të plotë të produkteve,” tha Lu Xinning, nënkryetare e qeverisë rajonale të Guangxi. “Ajo që synojmë është përshtatja më e mirë me nevojat e ASEAN-it dhe arritja e rezultateve sa më konkrete e solide në terren.” 
Foto nga VCG
Ekspozita përfshin gjithashtu një zonë të re që bashkon projekte dhe nevoja për aplikime nga vendet e ASEAN-it në fusha të tilla si transporti, logjistika inteligjente, AI, menaxhimi urban dhe zhvillimi i zonave industriale. Përveç kësaj, në zonën e ekspozitës financiare është shtuar një hapësirë prej 10,000 metrash katrorë kushtuar temës “AI plus Financë”. Duke përdorur inteligjencën artificiale si urë lidhëse, ekspozita po krijon një “super-ndërfaqe” për bashkëpunimin në ekonominë dixhitale midis Kinës dhe ASEAN-it. Kjo nismë vjen ndërsa Kina dhe ASEAN-i punojnë për të përshpejtuar zbatimin e Protokollit të Përmirësimit të Zonës së Tregtisë së Lirë Kinë-ASEAN (versioni 3.0), i cili u nënshkrua në tetor të vitit 2025 dhe përfshin fusha të tilla si ekonomia dixhitale dhe zhvillimi i gjelbër. 
Foto nga VCG
Lidhjet ekonomike midis Kinës dhe ASEAN-it kanë vijuar të thellohen. Tregtia dypalëshe e kaloi për herë të parë shifrën prej 1 trilion dollarësh në vitin 2025, duke arritur në 1.05 trilionë dollarë, një rritje prej 7.4% krahasuar me vitin paraardhës. Në shtatë muajt e parë të vitit 2026, tregtia midis dy palëve arriti në 744.41 miliardë dollarë, një rritje prej 24.7% në baza vjetore, duke përbërë 17.1% të totalit të tregtisë së jashtme të Kinës.
Kina ka mbetur partneri më i madh tregtar i ASEAN-it për 17 vite radhazi, ndërsa ASEAN-i ka qenë partneri më i madh tregtar i Kinës për gjashtë vite me radhë.
