Eksperti i sigurisë, Vlladimir Pivovarov, i ftuar në podkastin e Infomax “Biseda të vështira”, ka analizuar veprimet e institucioneve, me fokus policinë, e cila është dashur të ushtrojë kontroll mbi funksionimin e diskotekës Pulse në Koçan, por nuk e ka bërë një gjë të tillë, e cila ka çuar në tragjedinë me 59 të rinj të vdekur dhe mbi 150 të lënduar, përcjell Nistori.
Sipas Pivovarov, baza për një tragjedi të tillë është korrupsioni dhe çdo zgjerim i mëtejshëm i tij e bën sistemin jofunksional.
Pivovarov përgjegjësinë e vendos te policia e Koçanit, e cila është dashur, por nuk ka bërë, kontrolle në shumë aspekte të funksionimit të diskotekës, të cilat po të ishin bërë, nuk do të punonte fare.
“Kjo ngjarje, me sa di unë, është paralajmëruar në rrjetet sociale prej kohësh. Nëse është lajmëruar për një kohë të gjatë, dhe nuk është raportuar në organin për punë të brendshme, natyrisht se Zyra Rajonale e Koçanit, në bazë të njohurive të tilla, do të thotë se ata mbledhin njohuri, duhet të reagojnë menjëherë, gjegjësisht ta informojnë pronarin se nuk lejohet që të mbahet një koncert i tillë”, sqaron Pivovarov.
Ai sqaron se për të mbajtur një koncert të tillë, nëse do të kishte një kërkesë, autoriteti do të duhej të kontrollonte të gjitha dokumentet që lidhen me operacionin, të cilat, siç rezultoi, ishin të falsifikuara.
Edhe pse disa nga aspektet e funksionimit të klubit nuk janë nën autoritetin e policisë, megjithatë, sipas Pivovarov, policia është dashur t’i ketë këto informacione sepse diskoteka nuk plotësonte asnjë kërkesë teknike. Nëse policia kishte dijeni se ishte objekt i paligjshëm, se kishte zhurmë të tepërt, ishte kompetente të njoftonte organet e tjera kompetente shtetërore për të ndërmarrë veprime për të parandaluar përshkallëzimin, gjë që fatkeqësisht ndodhi.
Këto gjetje ngrenë pikëpyetje serioze për funksionalitetin dhe efikasitetin e sistemit, veçanërisht në fushën e mbikëqyrjes inspektuese dhe koordinimit ndërmjet autoriteteve kompetente.
“Pse ka kaq vite që ky objekt nuk është inspektuar për asnjë arsye? Kjo është pyetja që na shqetëson të gjithëve. A na sjell ai korrupsion i shkretë në një gjendje kaq të palakmueshme që ta paguajmë me gjak, t’ia paguajmë me varre me kryqe dhe me lotë të shumtë prindërve që nuk do t’i kthejnë kurrë fëmijët e tyre”, thotë Pivovarov. /Nistori/
