Disa banorë të lagjes Drenovec të Tetovës kanë protestuar

Disa banorë të lagjes Drenovec të Tetovës kanë protestuar për hapjen e një rruge në bllokun katër të kësaj lagjeje, e cila rrugë do të duhet që të lidhet me një tjetër rrugë ku gravitojnë shtëpitë e këtyre banorëve, infrastruktura e së cilës si kanalizimi, shtrimi me begatona, dhe ndriçimi publik është realizuar me vet kontributin e banorëve. Ata të revoltuar theksojnë se në asnjë mënyrë nuk do të lejojnë autoritetet komunale të Komunës së Tetovës që hapja e rrugës së re të lidhet me rrugën e lagjes së tyre për arsye se në këtë rrugë nuk është paraparë që të qarkullojnë numër më i madh i automjeteve sepse e njëjta është ndërtuar për të plotësuar vetëm nevojat e banorëve të kësaj lagje. Nga sektori për komunikacion, rrugë dhe tokë ndërtimore pranë Komunës së Tetovës, thonë se hapja e kësaj rrugë bëhet në interes të banorëve dhe e njëjta do të shërbejë për shkarkimin e komunikacionit të stërngarkuar në disa pjesë dhe lagje të qytetit përfshirë këtu edhe Lagjen Drenovec. Përndryshe, edhe pse punimet parapërgatitore për hapjen e kësaj rrugë kishin filluar, në vendngjarje ishte edhe një buldozer, banorët këmbëngulin se nuk do të lejojnë që të realizohen punime në drejtim të hapjes dhe lidhjes së rrugës me rrugën e lagjes së tyre, pasi që aspak nuk është marrë pëlqimi i tyre rreth këtij projekti.(u.h)