Bashkimi Demokratik për Integrim (BDI) shpreh zhgënjimin e thellë për vendimin e Qeverisë aktuale për shfuqizimin e vendimit të mëparshëm për ndërtimin e aksit rrugor Gostivar – Bukojçan që është pjesë e Korridorit 8 nëpërmjet të ndërtimit të tunelit që lidh Gostivarin me Kërçovën në vend të ndërtimit të autostradës në lartësi të madhe malore, thuhet në reagimin e BDI-së.
“Dëshirojmë të potencojmë se me vendimin e miratuar nga Qeveria e kaluar parashihej projektimi dhe realizimi i tunelit në gjatë 5 km në autostradën Gostivar- Bukojç që është pjesë e Korridorit 8.
Një vendim i tillë është marrë pas përfundimit të të gjitha analizave dhe hulumtimeve gjeo-mekanike për zgjedhjen e variantit më të mirë për ndërtimin e këtij aksi rrugor e cila është më e shpejt dhe më e sigurt për zhvillimin e komunikacionit dhe njëkohësisht më ekonomike për mirëmbajtjen e saj.
Me këtë vendim zgjidhen problemet gjatë ndërtimit të kësaj pjese të autostradës sepse në të kundërtën do paraqiten problemet që do të zgjate kohën dhe vlerën e ndërtimit, probleme këto që janë evidente në realizimin projekteve të filluara në të kaluarën.
Si zakonosht, shqiptarëve pa legjitimitetin e popullit shqiptar në Qeverinë monoetnike nuk iu dëgjua as zëri edhe as që u përfillën kur po cënohet projekti më i madh e më i rëndësishëm i vendit.
BDI thekson se ndërtimi i Korridorit 8 është i një rëndësie kyçe për lidhjen e Maqedonisë së Veriut me vendet fqinje dhe për përmirësimin e infrastrukturës rrugore që do të ndikojë në mënyrë pozitive në tregtinë dhe lëvizjen e lirë të qytetarëve dhe mallrave.
Ne besojmë se ky vendim është një hap prapa në përpjekjet tona për të përmirësuar infrastrukturën dhe për të forcuar pozitën strategjike të vendit tonë në rajon.
Ky vendim i gabuar duhet menjëherë të rishqyrtohet bashkë me partnerin strategjik dhe të ndërmerren masa për të vazhduar me realizimin e këtij projekti të rëndësishëm”, thuhet në komunikatën e BDI-së.
