Astrit Haraqija, ish-ministri i Kosovës, u arrestua dje në kuadër të një operacioni të gjerë policor të quajtur “Heshtja”, i cili ka për qëllim zbardhjen e një rrjeti të dyshuar për trafikim të kokainës në Prishtinë.
Avokati i Haraqijës, Korab Bokshi, ka folur për situatën e klientit të tij, duke theksuar se ai si figurë publike mund të ketë pasur kontakte me individë të përfshirë në këtë rast, por që nuk ka asnjë lidhje me akuzat që i janë bërë.
Bokshi shprehet se policia ka nisur hetimet me pretendimin se Haraqija është pjesë e një grupi të implikuar në kontrabandë me lëndë narkotike, por ai thekson se klienti i tij nuk ka njohuri për anëtarët e këtij grupi dhe se nuk ka asnjë fakt që e lidh atë me veprime të paligjshme.
“Astrit Haraqija ka deklaruar qartë se nuk ka lidhje me këtë rast. Ai është një person publik dhe mund të ketë pasur kontakte, por jo për këtë çështje,” tha Bokshi, duke shtuar se mbrojtja e tij nuk ka prova që e implikojnë atë në aktivitete kriminale.
Avokati gjithashtu përmendi se policia ka kryer një kontroll në shtëpinë e Haraqijës, por nuk ka gjetur asnjë provë që lidhet me akuzat e ngritura ndaj tij.
“Gjatë kontrollit, janë sekuestruar disa para që i përkasin fëmijëve të tij, të cilat do të demonstrohen si të ligjshme. Po ashtu, është gjetur një armë që Haraqija e ka me leje, por që ka skaduar afati i lejës dhe ai nuk e ka rinovuar për shkak të procedurave,” sqaroi Bokshi.
Seanca gjyqësore për Astrit Haraqijën është caktuar për sot, dhe pritet që të sjellë më shumë detaje mbi këtë rast të ndjeshëm për opinionin publik.


