Pushteti aktual po luan në kartë të rrezikshme, të shfrytëzojë konfliktin eventual ndëretnik për të mbuluar rezultatin e tyre politik gjatë këtyre viteve qeverisje. Kështu thotë juristi Naser Zyberi në intervistën javore të Radios Evropa e Lirë. Duke komentuar deklaratat e Ali Ahmetit, Zyberi tha se BDI-ja dhe lideri i saj Ahmeti nuk po munden të ndahen lehtë nga VMRO DPMNE-ja edhe pse publikisht i kanë dhënë përkrahje LSDM-së.
“Mendoj se BDI dhe Ali Ahmeti vazhdimisht janë pjesë e problemit. Nuk mundën të ndahen nga struktura e cila krijon probleme dhe më tej mendoj se deklaratat e tilla vetëm krijojnë konfuzion dhe shpresë tek ata që janë jashtë shumicës parlamentare që të bëjnë presion edhe më tej me protesta, dhe me një atmosferë të tillë të tensionuar, që të arrihet qëllimi, ndërsa qëllimi është që sërish të ulen në bisedime për gjetjen e ndonjë zgjidhjeje. Kjo do të thotë amnistim të strukturave të cilat janë fajtorë për krizën në të cilën gjendemi sot”, ka deklaruar Naser Zyberi, ish deputet. /
