Zaev: Nuk kemi bërë marrëveshje me shqiptarët kundër Serbisë

Kryeministri i Maqedonisë Zoran Zaev në një deklaratë për mediat serbe ka thënë se Qeveria e Maqedonisë është shumë e përkushtuar për të ndërtuar marrëdhënie të mira fqinjësore me Serbinë.
Zaev gjithashtu tha se Maqedonia nuk ka pasur për qëllim dhe asnjëherë nuk ka dhënë udhëzime për të kryer ndonjë aktivitet të inteligjencës kundër ndonjë vendi fqinj, përfshirë këtu edhe Serbinë.
‘Pa asnjë përfundim të parakohshëm, ne e respektojmë dhe mbështesim thirrjen e Beogradit zyrtar për të mbrojtur marrëdhëniet dypalëshe mes Serbisë dhe Maqedonisë dhe për të krijuar një kod të standardizuar të sjelljes. Shpresoj që bisedimet e sotme me presidentin Aleksandar Vuçiç do të zgjidhin të gjitha keqkuptimet e mundshme’, tha Zaev, duke paralajmëruar edhe bisedën telefonike që sot do ta zhvillojë me presidentin serb.
Sipas Zaevit, qasja e vetme konstruktive për tejkalimin e problemeve është dialogu i hapur dhe i drejtpërdrejtë për të gjitha çështjet. I pyetur nëse qeveria maqedonase ka bërë një marrëveshje me shqiptarët në dëm të interesave të Serbisë, Zaev thotë se këto janë lajme të rrejshme. ‘Më lejoni të jem i qartë, në politikën tonë nuk ka strategji dhe politikë në dëm të Serbisë’, tha Zaev.
Lidhur me çështjen e Kosovës, kryeministri maqedonas thotë se “Qeveria e Maqedonisë përpiqet të ndërtojë marrëdhënie miqësore të bazuara në respektimin e ndërsjellë dhe forcimin e marrëdhënieve tregtare”.