Ministri i Punëve të Brendshme, Pançe Toshkovski, prezantoi sot Strategjinë Kombëtare për Sigurinë në Komunikacionin Rrugor 2026–2030, duke bërë të ditur se numri i viktimave në aksidentet rrugore ka shënuar ulje të ndjeshme gjatë këtij viti.
Sipas të dhënave të prezantuara, të cilat i përcjell Tetovasot, në dhjetë muajt e parë të vitit 2026 në aksidente trafiku kanë humbur jetën 84 persona, krahasuar me 117 viktima në të njëjtën periudhë të vitit të kaluar, që do të thotë 33 jetë të shpëtuara më shumë.
Toshkovski theksoi se gjatë 35 viteve të fundit, në rrugët e Maqedonisë së Veriut kanë humbur jetën mesatarisht rreth 150 persona në vit, duke nënvizuar nevojën për një qasje të vazhdueshme dhe sistematike për rritjen e sigurisë në komunikacion.
“Çdo jetë është e çmuar. Njeriu mund të gabojë gjatë drejtimit të automjetit, por shteti duhet të bëjë gjithçka për të ulur numrin e viktimave dhe të të lënduarve në komunikacion”, deklaroi ministri.
Tetovasot raporton se ministri falënderoi qytetarët për sjelljen më të përgjegjshme në trafik, duke vlerësuar se ndërgjegjësimi i drejtuesve të automjeteve, masat parandaluese të institucioneve dhe fushatat edukative kanë ndikuar drejtpërdrejt në uljen e aksidenteve dhe viktimave.
Strategjia e re Kombëtare parashikon që deri në vitin 2030, numri i personave që humbin jetën në aksidente rrugore të ulet me 50 për qind, krahasuar me vitin 2024. Dokumenti mbështetet në parimin “Çdo jetë ka vlerë” dhe përfshin masa për edukim, parandalim, përmirësim të kulturës në trafik dhe përdorimin e teknologjive moderne.
Një tjetër lajm i rëndësishëm, sipas Tetovasot, është se përpjekjet e Maqedonisë së Veriut në fushën e sigurisë rrugore kanë marrë edhe vlerësim ndërkombëtar. Ministria e Punëve të Brendshme është përzgjedhur ndër pesë institucionet finaliste për një çmim prestigjioz në Samitin Botëror të Policisë që do të mbahet në Dubai, së bashku me shërbime policore nga vende si Singapori dhe Emiratet e Bashkuara Arabe.
Në përfundim, Toshkovski shprehu bindjen se me bashkëpunim ndërmjet institucioneve dhe qytetarëve, respektim më të madh të rregullave të komunikacionit dhe investime të vazhdueshme në sigurinë rrugore, vendi do të afrohet gjithnjë e më shumë drejt objektivit për të pasur sa më pak aksidente dhe humbje jetësh njerëzore.
