25 March
Shifra alarmante të përdoruesve të drogës në Tetovë dhe Gostivar. Sipas të dhënave zyrtare të Ministrisë së Brendshme numri i të varurve nga mjetet narkotike në këto dy qytete për momentin arrin në 1300 por, besohet se shifra realë është shumë më e lartë. Dy ish përdorues të heroinës të cilët trajtohen në Qendrën për shërim me metadon në Tetovë rrëfyen për Alsat dramën që kanë përjetuar dhe pasojat që i vuajnë ende. Sipas tyre gjithçka fillon me mendimin se nuk ka asgjë të keqe po të provohet një herë.
“Në fillim merrja drogë, heroinë merrja…Heroina më ka bërë shumë dëm. E kam filluar në Gjermani dhe më ka bë shumë dëm..kam prishur familjen kam prishur gjithçka, s’ka çka nuk kam prishur më. Të rinjtë i kisha porositur që marijuanën mos e provojnë kurrë se nga marijuana vjen kjo, kokaina, heroina e krejt. Për qejf fillohet por pastaj fundi është shumë i keq, shumica mendojnë do e marr njëherë dhe jo më, por mashtrohen pas dy apo tre vite sërish e merr”.
Sa vjeçar je?
35, në fillim nisa me kanabis sativa pastaj heroinë tani në metadon jam. Shumë pishman jam për tepër, krejt karriera mu shkatërrua.
Në fillim e nise për qejf apo?
Krejt për qejf nisin me shokët e këqij, pastaj ja. Shumë pishman jam por skam çka bëj më. Mos u merrni me këta punë rrini sa më larg”.
Por përveç personave që vendosin të shërohen nga varësia nga droga, ka dhe shumë të tjerë të cilët nuk kërkojnë ndihmë nga kjo Qendër rehabilitimi. Në mungesë të mjeteve financiare, ata e sigurojnë metadonin nga disa barnatore që e shesin atë në të zezë, ndërkohë që vendi ku e konsumojnë drogën që me mëngjes, është hapësira prapa Spitalit Klinik të Tetovës.
“Siç edhe mundët ta shihni në video, ky është vendi që më së shpeshti përdoret nga narkomanët që marrin drogë. Por, pse pikërisht në afërsi të spitalit të Tetovës? Sipas informatave jozyrtare, flitet se ka ca barnatore që shkelin ligjin, duke shitur metadon në të zezë gjë që i bën narkomanët ta blejnë dhe të vinë për ta përdorur në këto vende që sipas tyre janë më të fshehta”.
Ndër arsyet kryesore për rritjen e numrit të përdoruesve nga droga, sipas mjekëve janë situata socio- ekonomike e vendit, në veçanti shkalla e lartë e papunësisë te të rinjtë.
Numri i evidentuar qoftë në spital apo SPB, gjithnjë shumëzohet me 10. Ne në qendrën tonë që funksionon që prej dhjetë vitesh, kemi të evidentuar 130 të atillë. Duhet të punohet në aspektin social, ka hapësirë për tu punuar por ja që nuk punohet sa duhet dhe ky fenomen sa vjen e bëhet më i rëndë dhe më i rrezikshëm dhe për fat të keq ka depërtuar edhe në shkollat fillore – tha Dr. Musli Ferati, Reparti Psikiatrik i Spitalit.
Vitin e kaluar, në territorin e Tetovës dhe Gostivarit janë zbuluar gjithsej 68 vepra penale të këtij lloji. Respektivisht, janë zbuluar dhe konfiskuar mbi 192 kilogram marijuanë, 55 gram heroin dhe sasi të tjera më të vogla si përzierje të duhanit dhe marijuanës, hashashit, kokrrave e kështu me radhë – u shpreh Marjan Josifoski, zëdhënës i SPB Tetovë.Sipas të statistikave pjesa dërrmueseve e përdoruesve të drogës janë të rinj, meshkuj por nga kjo dukuri negative janë të prekura edhe femrat. Mjekët thonë se edhe pse dëmet nga përdorimi i drogës janë të parikuperueshme, ka edhe shanse për rikthim në jetën normale.
Bashkim Sulejmani
