Shoqata e Gazetarëve të Maqedonisë dënon kërcënimin e ekipit të TV SHENJA

Shoqata e Gazetarëve të Maqedonisë ka reaguar ashpër pas kërcënimeve të simpatizantëve dhe aktivistëve të BDI-së ndaj ekipit të Televizionit SHENJA, si dhe kërkon kapjen dhe dënimin e kërcënuesve. “Shoqata e gazetarëve të Maqedonisë dënon kërcënimet e simpatizantëve të Bashkimit Demokratik për integrim ndaj ekipit të Televizionit Shenja, të cilët dje penguan raportimin e tyre për problemet komunale në Komunën e Çairit. Ju bëjmë thirrje institucioneve përkatëse t‘i identifikojnë dhunuesit dhe t’i sjellin para drejtësisë. Dhuna ndaj gazetarëve dhe punonjësve të medias është e papranueshme dhe paraqet sulm mbi demokracinë. Shteti ka obligim të sigurojë sistem efikas për parandalimin dhe ndëshkimin e dhunës ndaj gazetarëve. Ky është parakusht themelor për përmirësimin e gjendjes së lirisë së fjalës”, thuhet mes tjerash në reagimin me shkrim të SHGM-së. Shoqata e Gazetarëve, gjithashtu, përshëndet edhe deklaratën e kryeministrit Zoran Zaev, i cili sot i dënoi kërcënimet ndaj TV Shenja-s dhe bëri thirrje për hetimin e rastit dhe dënimin e dhunuesve.