Një sërë kërcënimesh për vendosje të mjeteve shpërthyese u shpërndanë përmes postës elektronike të premten në dhjetë shkolla të Shkupit dhe në pesë në qytetin e Manastirit; në Aeroportin Ndërkombëtar të Shkupit, në dy hotele të njohura, “Alexander Pallace” dhe “Marriot”, në qendrën tregtare “East Gate” si dhe një sallë sporti.
Kryeministri maqedonas, Dimitar Kovaçevski kishte planifikuar mbajtjen e një fjalimi në hotelin “Alexaner Pallace” mëngjesin e së premtes, së bashku me ministrat e Ekonomisë dhe Financave, por ngjarja u anulua për shkak të alarmit kërcënues.
Alarmet rezultuan të rreme, sipas autoriteteve.
Ndërkohë, aeroporti i Shkupit u rihap përsëri pas kontrolleve dhe konstatimit se nuk ekziston rrezik për pasagjerët dhe punonjësit.
Vetëm një ditë më parë pati alarme të rreme në rreth pesëdhjetë shkolla të Shkupit dhe të Kumanovës. Mes prindërve të nxënësve vihet re shqetësimi për shkak të humbjes së mësimit dhe pasojave të tjera eventuale dhe për shak të pamundësisë së organeve policore që të zbulojnë autorët.
Opozita maqedonase e ka kritikuar Ministrin e Rendit, Oliver Spasovki duke kërkuar dorëheqjen e tij të menjëhershme dhe duke e akuzuar atë për paaftësi.
Ndërkohë, autoritetet policore nuk japin shumë hollësi lidhur me këto zhvillime, përveç njoftimeve se kërcënimet vijnë nga shtete të ndryshme prej adresave fiktive të e-maileve përmes rrjeteve private, VPN që e bëjnë të pamundur zbulimin e orgjininës së postës elektronike.
Kryeministri Kovaçevski e ka quajtur luftë hibride, ndërsa qeveria e tij ka njoftuar NATO-n për këto kërcënime./VOA
