Shkon në 80 euro çmimi për bojkotim të votimit në Tearcë

Rivotimi i së dielës në Tearcë të Tetovës nuk pritet që ta ndryshojë shumë gjendjen, nëse merren parasysh numrat, ndërsa formimi i Qeverisë mbetet pika kryesore rreth së cilës do të bëhet zgjidhja apo rëndimi i krizës politike në Maqedoni në ditët në vijim. Mirë do të jetë, thonë pjesëmarrësit në proceset politike, që sa më parë të konstituohet parlamenti që të mund të parandalohet destabilizimi më i madh i vendit, që nuk përjashtohet se do ta bëjë VMRO-DPMNE-ja po s’arriti të formojë qeveri.
Në Tearcë para zgjedhjeve të së dielës në shikim të parë situata është e qetë, atje janë të pranishëm përfaqësuesit e LSDM-së të cilët publikisht japin deklarata, por edhe të VMRO-DPMNE-së, të cilët larg kamerave përpiqen të arrijnë bojkot të votimit.
Sipas informatave jozyrtare që i publikon plusinfo.mk, megjithëse fillimisht kanë ofruar nga 2.000 denarë për familjet që do të pranojnë të mos dalin në votim, dje oferta është rritur në 5.000 denarë, apo rreth 80 euro. Paratë u ofrohen edhe shqiptarëve, edhe maqedonasve, edhe turqve… gjithkund ku mendojnë se mund të ndikojnë.
Në vendvotimin në Tearcë, ku do të përsëritet votimi, janë të regjistruar 714 votues, në zgjedhje më 11 dhjetor dolën 404, që është vetëm pak më shumë nga dallimi mes këtyre dy partive në nivel të njësisë numër 6, që është 303 në favor të VMRO-së.