Kompanitë dhe qytetarët që janë të vetëpunësuar kanë mundësi që të shfrytëzojnë mjete financiare për pagat e muajit nëntor, si një nga masat e Qeverisë së Maqedonisë së Veriut për luftimin e pasojave të shkaktuara nga pandemia, transmeton Portalb.mk.
“Sot kompanitë filluan të dorëzojnë Kërkesën për mbështetje financiare për pagat e punëtorëve për muajin nëntor të vitit 2020 si dhe personat që kryejnë aktivitete të pavarura dorëzuan Kërkesën për mjete financiare”, njoftojnë nga Drejtoria për të ardhura publike (DAP).
Konfirmimi i kërkesës së kompletuar bëhet brenda 3 ditëve nga data e dorëzimit të kërkesës, që duhet të jetë deri më 10 dhjetor.
Në muajin tetor, mbështetja financiare për këta të punësuar ka arritur në 951 252 239 denarë, për 18 813 kompani, për të financuar pagën e 60 895 të punësuarve. Për 4277 të vetëpunësuar, mbështetja financiare ka arritur në 329 792 920 denarë.