Ministrja e Arsimit dhe Shkencës, Vesna Janevska, së bashku me drejtoreshën e Qendrës Shtetërore të Provimeve, Daniela Jovçevska-Mihajlovska, kanë shpallur rezultatet e provimeve të maturës shtetërore për afatin e qershorit.
Sipas të dhënave zyrtare, në këtë afat u regjistruan gjithsej 15.004 maturantë nga të gjitha drejtimet dhe gjuhët e mësimdhënies në arsimin e mesëm të përgjithshëm, profesional dhe artistik. Rreth 3 për qind e tyre nuk morën pjesë në provime.
Nota mesatare e përgjithshme e arritur në dy provimet e jashtme shtetërore është 3.69, një përmirësim i dukshëm krahasuar me vitin e kaluar, kur nota mesatare ishte 3.26. Ministrja Janevska u shpreh e kënaqur me rezultatet dhe theksoi se këtë vit ka pasur më pak raste të riprovimeve. Megjithatë, ajo bëri të ditur se 172 nxënës kanë tentuar të kopjojnë, duke u përpjekur të anashkalojnë sistemin.
Provimi i parë, i detyrueshëm për të gjithë maturantët – gjuha amtare dhe letërsia (maqedonisht, shqip, turqisht ose serbisht) – u zhvillua më 31 maj, ndërsa provimi i dytë, opsional, u mbajt më 11 qershor.
Për ata që nuk arritën të kalojnë provimet në qershor, u është dhënë mundësia që të riprovonë në afatin e gushtit. Sipas njoftimit zyrtar, më 12 gusht do të mbahet provimi në gjuhën amtare dhe letërsi, ndërsa më 14 gusht do të mbahet provimi i jashtëm opsional në një nga lëndët e zgjedhura: matematikë, anglisht, frëngjisht, gjermanisht, rusisht, italisht, filozofi ose estetikë.
Matura shtetërore është pjesë e sistemit arsimor në vend që nga viti 2007 dhe mbahet rregullisht në dy afate – qershor dhe gusht. Përjashtim ka qenë vetëm viti shkollor 2019/2020, kur për shkak të pandemisë së Covid-19, provimet nuk u organizuan.
