Prokuroria Speciale Publike e merr në shqyrtim lëndën “Sopoti”

Prokuroria Speciale Publike e ka marrë në shqyrtim lëndën “Sopoti”, ka konfirmuar mbrojtja e të akuzuarve të këtij rasti. Ky vendim u mor pasi që në seancën e kaluar e fitoi lëndën nga Prokuroria për Krim të Organizuar dhe Korupcion dhe kishte afat prej 8 ditësh që të deklarohet. Avokati Naser Raufi vërtetoi se ka marr njoftim nga PSP në të cilën thuhet se në seancën e ardhshme që do të mbahet në shtator, lëndën do ta përfaqësojnë një prokuror nga grupi i Katica Janevës. Rasti “Sopoti” ka histori prej 14 vitesh. 12 banorë nga fshati Sopot u akuzuan se në mars të vitit 2003 kanë vendosur eksploziv  në rrugën lokale Sushevo-Sopot, ku në këtë eksplodim u vranë dy anëtarë të kontingjentit polak të NATOS dhe një civil maqedonas. Kjo ndodhi dy vjet pas konfliktit 2001, kur Maqedonia ende po e merrte veten nga pasojat që  i shkaktuan veprimet e armatosura edhe në planin e sigurisë edhe atë ndëretnik. >