Problemet me transportin dhe furnizimin me ushqime në Itali po ngrenë shqetësime për rritjen e çmimeve edhe në vendet e tjera evropiane, përfshirë Maqedoninë e Veriut.
Bllokadat e rrugëve dhe protestat e kompanive të transportit kanë shkaktuar vështirësi në furnizim, ndërsa disa supermarkete në jug të Italisë kanë mbetur me rafte të zbrazëta. Prodhuesit e mocarelës nga qumështi i buallit në rajonin e Kampanjës raportojnë humbje prej rreth tre milionë eurosh në ditë. Ndërkohë, prodhuesi i njohur i makaronave „Rummo“ ka ndërprerë prodhimin për shkak të mungesës së lëndëve të para.
Presion shtesë mbi çmimet krijojnë shtrenjtimi i energjisë dhe plehrave kimike, kostot e larta të transportit, si dhe thatësirat dhe valët e të nxehtit. Sipas parashikimeve të përmendura në raport, inflacioni i ushqimeve në eurozonë mund të arrijë në 3,4 për qind në tremujorin e tretë të vitit 2027.
Pasojat mund t’i ndiejnë edhe konsumatorët në Maqedoninë e Veriut, e cila importon një pjesë të produkteve ushqimore. Vështirësitë në furnizim dhe rritja e kostove të blerjes e transportit mund të ndikojnë në çmimet në marketet vendore.
Megjithatë, deri më tani nuk ka të dhëna të konfirmuara për mungesë ushqimesh në dyqanet e vendit. Nëse do të ketë shtrenjtim, kjo do të varet nga kohëzgjatja e problemeve dhe zhvillimet e çmimeve në tregjet evropiane.
