Pas katër javësh negociatash intensive në OKB, shtetet nënshkruese të Traktatit për Mospërhapjen e Armëve Bërthamore (NPT) nuk arritën të bien dakord mbi një tekst të përbashkët që do të riafirmonte angazhimet për çarmatimin dhe mospërhapjen bërthamore.
Lajmi u konfirmua nga presidenti i seancës, diplomati vietnamez Do Hung Viet, i cili deklaroi se, pavarësisht përpjekjeve të shumta, konferenca nuk ishte në gjendje të arrinte konsensus mbi dokumentin përfundimtar.
“Pavarësisht të gjitha përpjekjeve tona, e kuptoj që kjo seancë nuk është në gjendje të arrijë një marrëveshje mbi punën e saj themelore”, tha ai në mbyllje të konferencës.
Vendeve anëtare iu shpërnda disa herë një draft i ndryshuar, në përpjekje për të zbutur kundërshtitë mes palëve. Vetë Viet pranoi me ironi diplomatike se qëllimi ishte që dokumenti “t’i bënte të gjithëve jo të kënaqur në mënyrë të barabartë”.
