Shkolla fillore “Gjorgjia Pulevski” në Shkup ka diskriminuar në mënyrë indirekte një nxënës mbi bazën e aftësisë së kufizuar në arsim, konstatoi Komisioni për Parandalimin dhe Mbrojtjen nga Diskriminimi. Në fund të vitit 2024, në një klasë të gjashtë u transferua një nxënës i cili më parë kishte qenë viktimë e dhunës.
Sipas përshkrimit në ankesë, pas transferimit në klasën e re, viktima u shndërrua në dhunues – ndaj një fëmije me vështirësi në të mësuar dhe në të shprehur, përdorte fjalë fyese si “budalla”, “i retarduar”, e shtynte, i vendoste pengesa dhe i shkelmonte çantën, e provokonte vazhdimisht. E gjithë kjo kulmoi kur i dha një shuplakë dhe ndodhi një përplasje fizike mes dy fëmijëve në korridorin e shkollës. Fëmija i maltretuar reagoi duke ia thyer telefonin bashkëmoshatarit dhe duke e kafshuar. Nëna e fëmijës së maltretuar kishte raportuar në shkollë, por ata nuk kishin reaguar derisa djali i saj nuk ia theu telefonin dhunuesit – dhe atëherë të dyve u është dhënë një vërejtje gojore.
Nëna u ankua në Komision se djali i saj u vërejt verbalish pa u shqyrtuar se çfarë kishte çuar në atë reagim, përkatësisht pa u marrë parasysh se ai ishte rezultat i një dhune të raportuar, që shkolla kishte injoruar. Ajo theksoi se shkolla kishte qenë në dijeni se djali i saj kishte zhvillim atipik dhe vështirësi të veçanta në të mësuar, se nuk mund të shprehej dhe të konfrontohej verbalish, megjithatë nuk ndërmorën asnjë hap për denoncimet e dhunës, duke krijuar kështu diskriminim për shkak të trajtimit të ndryshëm.
Më 30 janar 2025, në një takim me drejtorin e shkollës, ai kishte deklaruar se “fëmija duhet të mësohet dhe të përgatitet për sfidat në jetë kur ngacmohet, e jo të qajë vazhdimisht”, thuhet në ankesë.
