Nis debati për Ligjin e gjuhëve, VMRO-DPMNE: Të mos keqpërdoret Ligji me siglën e BE-së

Kuvendi ka filluar sot debatin për ligjin e gjuhëve. Propozim ligji përmban siglën e BE-së andaj dhe komisioni i parë në të cilin filloi të shqyrtohet është komisioni parlamentar për çështje evropiane. Por që në fillim të debatit VMRO-DPMNE ka kontestuar siglën e BE-së para këtij ligji. Antonio Milloshovski në ndërhyrjen e tij tha se kjo sigël vendoset vetëm gjatë përputhjes së legjislatives vendore me atë evropiane. Meqë në propozim ligj nuk përmendet se me cilin ligj të BE-së unifikohet ky ligj, ai kërkoi që sigla e BE-së të hiqet dhe të hapet edhe debat publik.
“Kërkoj nga ministri i drejtësisë të prononcohet se me cilin ligj të BE-së unifikohet ky ligj, cilin shtet e kanë marrë si shembull. Kërkoj që të hiqet sigla e BE-së nga ky ligj dhe të mos keqpërdoret, por të hapet debat publik”, tha Milloshovski.
Propozimi për heqjen e sighs së BE-së nga ky ligj u vendos në votim dhe i njëjti u refuzua.
Gjatë një ndërhyrje procedurale, deputeti tjetër i VMRO-DPMNE-së, Ilija Dimovski akuzoi se propozimi ka hyrë në procedurë parlamentare dhe i është vendosur sigla e BE-së për qëllime politike parazgjedhore.
Dimovski tha se ligji përmban shumë mangësi, ndërsa si shembull ai tha se në udhëzimet e medikamenteve mjekësore nuk është paraparë përdorimi i gjuhëve të tjera edhe pse kjo është në interes të drejtpërdrejtë të qytetarëve të Maqedonisë.