Paga mesatare mujore neto në vend vazhdon të shënojë rritje dhe në maj 2026 ka arritur në 49.544 denarë, duke iu afruar pragut simbolik prej 50 mijë denarësh. Megjithatë, pas kësaj mesatareje fshihen dallime të konsiderueshme mes sektorëve ekonomikë, ku disa profesione vazhdojnë të paguhen dukshëm më mirë se të tjerat.
Sipas të dhënave të publikuara nga Enti Shtetëror i Statistikave, paga mesatare neto është rritur për 8,2 për qind krahasuar me majin e vitit 2025, ndërsa në raport me prillin e këtij viti ka shënuar një rritje prej 1,6 për qind.
Rritjen më të madhe vjetore e ka regjistruar sektori i furnizimit me ujë, largimit të ujërave të ndotura, menaxhimit të mbeturinave dhe aktiviteteve të sanimit të mjedisit, me një rritje të pagës mesatare prej 11,9 për qind.
Pas tij renditet sektori i artit, argëtimit dhe rekreacionit, ku pagat janë rritur për 11,3 për qind, ndërsa në sektorin e transportit dhe magazinimit rritja vjetore ka arritur në 10,9 për qind.
Në nivel mujor, krahasuar me prillin, rritja më e lartë është evidentuar në tregtinë me shumicë dhe pakicë, si dhe në riparimin e automjeteve dhe motoçikletave, ku pagat janë rritur për 6,3 për qind. Në sektorin e minierave dhe nxjerrjes së gurit rritja mujore ka qenë 5,8 për qind, ndërsa në transport dhe magazinim 5,7 për qind.
Edhe pse disa sektorë kanë shënuar ritmet më të shpejta të rritjes, teknologjia e informacionit vazhdon të mbetet sektori me pagat mesatare më të larta në vend. Në anën tjetër, hoteleria dhe gastronomia mbeten ndër degët me të ardhurat më të ulëta për punonjësit.
Statistikat tregojnë gjithashtu se paga reale neto, e llogaritur duke marrë parasysh inflacionin, është rritur për 5,3 për qind krahasuar me majin e vitit të kaluar. Kjo nënkupton se, mesatarisht, pagat janë rritur me një ritëm më të shpejtë se sa kostoja e jetesës.
Ndërkohë, paga mesatare mujore bruto në maj ka arritur në 74.482 denarë, duke shënuar gjithashtu një rritje prej 8,2 për qind në baza vjetore.
Të dhënat e fundit konfirmojnë se pagat në vend vazhdojnë të rriten, por në të njëjtën kohë nxjerrin në pah hendekun e madh mes sektorëve. Ndërsa disa degë ekonomike po përjetojnë rritje të shpejtë ose ofrojnë paga të larta, një numër i konsiderueshëm i të punësuarve vazhdon të mbetet dukshëm nën mesataren shtetërore.
MARKETING
