Gjatë ditës së sotme është ndarë nga jeta veprimtari i çështjes shqiptare nga Kumanova, Metush Osmani. Metush Osmani, u lind në fshatin Çelik të Gjilanit në vitin 1940. Ai gjatë veprimtarisë së tij dhe gjatë protestave në vitin 1988 në Kumanovë kundër mbylljes së paraleleve shqipe në shkollat e mesme, nga pushteti i atëhershëm u dënua me 10 vite burg, shkruan gazeta KOHA. I njëjti, pasi doli nga burgu, pësoi një aksident komunikacioni bashkë me familjen, duke i lënë pasoja të mëdha shëndetësore. Atëkohë, dyshohej se aksidenti ishte shkaktuar me skenar të pushtetit të atëhershëm komunist. Vdekja e tij është një humbje e madhe për qytetin e Kumanovës dhe kombin shqiptar. (koha.mk)
