Tejkalimi i problemit bilateral është sfida kryesore, ndërsa shteti ndodhet në situatë jashtëzakonisht komplekse për shkak të vendimeve të pamenduara dhe çështjeve të pranuara nga Qeveria e mëparshme. Kështu ka deklaruar dje në Kanall 5 ministri i Punëve të Jashtme , Timço Mucunski. Ai thotë se Qeveria, përmes bisedimeve me përfaqësuesit e Bashkimit Evropian, po kërkon mënyrë për të siguruar parashikueshmëri në proces, me qëllim që të shmanget përsëritja e së njëjtës situatë hipotetike në të ardhmen, transmeton Portalb.mk.
Ai konsideron se sigurimi i një mekanizmi të tillë mbrojtës nuk do të jetë i lehtë dhe nuk do të ndodhë brenda natës, por tha gjithashtu se shteti, në aspektin strategjik, nuk ka alternativë apo “plan B”, sepse i vetmi “plan A” për Maqedoninë mbetet evropianizimi dhe anëtarësimi i plotë në BE.
“Personalisht jam i bindur se Bashkimi Evropian gjatë historisë së tij ka treguar se kur ekziston shtysë politike, kur ekziston vullnet politik, gjen mënyrë për të arritur një zgjidhje dhe nuk ka askush që mund të më bindë se nuk është kështu. Ne duhet të bëjmë gjithçka që është e nevojshme nga ana jonë, të dëshmojmë jo vetëm me fjalë se jemi për Bashkimin Evropian”, tha Mucunski.
Edhe pse Mucunski nuk konsideron se qëllimi është të pritet pafundësisht, ai thotë se shteti nuk e ka luksin të pranojë zgjidhje me çdo kusht dhe pas një kohe të shkurtër të kthehet sërish te e njëjta çështje, pasi në të kaluarën shumë herë është premtuar se lëshimet kombëtare do të sillnin statusin e liderit, prandaj tani pozicionet kombëtare duhet të vendosen mbi një themel të fortë.
Duke iu përgjigjur kritikave të partive opozitare për ndryshimin e pretenduar të qëndrimeve shtetërore, Mucunski i hodhi poshtë këto pretendime, duke i cilësuar si hipokrizi dhe histeri nga ana e atyre që flisnin për evropianizim, ndërsa bllokonin ligjet e kërkuara nga Bashkimi Evropian.
Kujtojmë se Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime. Qeveria aktuale në Shkup ka deklaruar se nuk do t’i bëjë këto ndryshime.
Me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.
