Ministria e Financave ka filluar t’u paguajë mjete kompanive që kanë paguar në buxhet në vitin 2023 në bazë të Ligjit për tatimin e solidaritetit. Deri më tani, përmes thesarit të Ministrisë së Financave janë realizuar urdhëresa në një vlerë totale prej 990 milionë denarësh.
Shuma totale që kompanitë paguan në buxhet në vitin 2023 ishte 3 miliardë denarë. Shteti do të kthejë gjysmën e kësaj shume këtë muaj, ndërsa gjysmën tjetër të shumës në mars të vitit 2027.
“Ministria e Financave, bazuar në një urdhër të Qeverisë, zbatoi një procedurë transparente dhe gjithëpërfshirëse përmes së cilës u përcaktua modaliteti me të cilin shteti do t’i kthejë mjetet e mbledhura nga kompanitë pas vendimit ligjor që u anulua nga Gjykata Kushtetuese. Kjo është një procedurë që e kemi përcaktuar së bashku me kompanitë në mënyrë që të mund t’i kthejmë mjetet, pa e prishur likuiditetin e buxhetit”, thotë ministrja e Financave, Gordana Dimitrieska-Koçoska.
Ligji për Tatimin e solidaritetit u miratua nga Kuvendi në vitin 2023. Zgjidhja ligjore mbulonte kompanitë që gjeneruan të ardhura totale prej më shumë se 615 milionë denarë në vitin 2022, dhe në përputhje me Ligjin, 49.2 milionë euro u paguan në buxhet nga 156 kompani në vitin 2023. Pas anulimit të Ligjit nga Gjykata Kushtetuese, shteti u detyrua të kthente mjetet që u paguan në buxhet në bazë të Ligjit.
Rimbursimi i mjeteve kryhet në bazë të një kërkese të paraqitur nga kompanitë në Drejtorinë e të Ardhurave Publike, dhe në bazë të një rregulloreje të miratuar që ndryshon dhe plotëson rregulloren mbi formën dhe përmbajtjen e formularit të kërkesës për rimbursimin e taksës së mbledhur tepër ose gabimisht. Kompanitë i paraqesin kërkesat në Drejtorinë e të Ardhurave Publike dhe, sipas të dhënave, deri më tani kanë paraqitur kërkesa gjithsej 117 kompani.
