Kryetari i Qeverisë, Hristijan Mickoski, në intervistë për “Klik Plus” në TV21, lidhur me mundësinë e mbajtjes së zgjedhjeve të parakohshme, theksoi se kjo është e mundur, se kurrë nuk duhet thënë kurrë, por Qeveria punon për një mandat katërvjeçar, ndonëse VMRO-DPMNE-ja, si parti, është gjithmonë e gatshme për zgjedhje, transmeton Portalb.mk.
Kryeministri Mickoski shtoi se në politikë kurrë nuk duhet thënë kurrë, pasi ky është gabimi më i madh që bëjnë individë të caktuar, përkatësisht se gjithmonë duhet ta mbani derën paksa të hapur për çdo politikë.
“Ajo që dua të them dhe që e them është se kjo Qeveri ka mandat katërvjeçar. Ja, ne flasim për periudhën deri në fund të mandatit, a mund të jetë paga mesatare 60.000 denarë? Unë them: mundet, po, mundet edhe jo, por do të bëjmë gjithçka për t’iu afruar kufirit prej 60.000 denarësh. Kështu që, si parti politike, jemi gjithmonë të gatshëm për zgjedhje, por punojmë për një mandat të plotë katërvjeçar, për të cilin e kemi fituar legjitimitetin nga qytetarët”, theksoi Mickoski.
Lidhur me partnerin e koalicionit në Qeveri, VLEN-in, kryeministri Mickoski theksoi se është shumë i kënaqur me ministrat e tyre dhe se gjithçka funksionon në frymën e partneritetit.
“Ne funksionojmë si partnerë në Qeveri. Jam i kënaqur me punën e njerëzve nga VLEN-i. Absolutisht jam shumë më i kënaqur me kapacitetin e këtyre njerëzve sesa me kapacitetin e ministrave të BDI-së pas 20 vjetësh në pushtet”, theksoi Mickoski.
Mickoski, disa herë e ka përsëritur idenë e zgjedhjeve të parakohshme parlamentare. Edhe në shtator, maj dhe qershor të këtij viti, ai tha së shpejti do të ketë zgjedhje,për të shtuar një ditë më pas se dëshiron që zgjedhjet parlamentare të mbahen në vitin 2028.
