Komisioni Evropian shkurtoi dy milionë euro nga fondet evropiane të destinuara për financimin e projekteve në nivel lokal në Maqedoni, mëson Alsat – M. Bëhet fjalë për para që duhet të përdoren për studime, për përpunimin e projekteve të stacioneve të filtrimit dhe projekte të tjera investimi në komunat Kavadar, Gostivar dhe Dibër. Sipas burimeve të Alsat M, Brukseli i ka shkurtuar paratë për shkak të shkeljes së afateve për evaluim. Sipas informacioneve, afati i fundit për përgatitjen e studimeve ishte 25 prill 2016. Alsat – M kërkoi qëndrim nga Ministria e Ekologjisë, për arsyen e shkurtimit të fondeve dhe nëse ministria ka njohuri për zhvillimin e projekteve në zyrat e saj në komunat e përmendura. Deri në fillim të lajmeve nuk morëm asnjë përgjigje. Vetëm Ministri i ekologjisë Bashkim Ameti në një bisedë të shkurtër telefonike për Alsat-M, tha se kishte njohuri mbi gjendjen, por nuk ka konfirmim zyrtar për shkurtimin e parave.
