Kuvendi i Maqedonisë së Veriut ka konstatuar dorëheqjen e deputetes Ilire Dauti nga Komisioni për Politikë Sociale, Demografi dhe Rini.
Ajo dorëheqjen e kishte dorëzuar sot në Kuvend, ndërsa kërkoi edhe të mbajë fjalim prej 15 minutave, që fillimisht ju mohua nga kryetari i Kuvendit Afrim Gashi, ndërsa më pas deputetët e Fronti Evropian bllokuan foltoren e Kuvendit.
Pas pauzës, deputetja Dauti mbajti fjalimin e saj duke treguar arsyet pse ka dhënë dorëheqje.
“Mësoni të respektoni rregullat, ligjet dhe procedurat. Pa dyshim zëri im do të dëgjohet sot dhe shpjegimi im për veprën e keqe që keni bërë. Turp për ju! Kërkuat shkarkimin tim dhe ai shkarkim sapo ndodhi. Prandaj dua të shfrytëzoj të drejtën time dhe ta arsyetoj. Kërkoj kohën e nevojshme prej 15 minutash për të shpjeguar dorëheqjen time”, tha Dauti.
